Bä ciah Hilary ah ghinlu a mong
Hnguh hmat k’chang tu mat ah kya ciah bä ciah Hilary cu Christu kum 315 ung Pyinhtit khaw, Poitiers (pot-ti-eits) maanggo ung ng’büh mang k’kyawng khui ung ka noh ng’tüi lo ciah kya ci. A ni cu kho gùp gui m’shümchuk nak ah lam ung ka noh ng’ vai lo ci ah kya ci. A ni cu chumah ne a hta hngumi tu mat gah ciah kya ci. A kho kum 30 a be lo yah ung a ni cu ng’müng van tüi pyang ciah Khanpughü tu mat bäng vah om ci ci cu yum lo ne ng’thu k’ni ung a ni no a shui ah a mong gui cu cang ci ah hmat lo ne a m’lungnga ng’thonghlat lo hleih m’shi nak Sacramentu cu ci tu ciah kya ci. A ni cu yum tu k’chang tu mat düt ah kya tu lang pang hleih phih k’chang gui a daa ah yum ngak nak awn Poitiers mânggo ung Taigü mâng tu mat ah a kya lo vai a mi ghü u hleih Christu kum 353 ung Taigü Mâng ah kya lo ci.
Hilary cu Boi Yesu cu Khanpughü ah kä kya ci ci ah a mi m’thei m’cäi läklam gui ng’hngu ng’tuk püi ne Boi Yesu cu a cang ah Khanpughi ah kya ci ci-cu ghung ne m’hteng ne pyein hlak ciah kya ci. A cun ah Hilary no m’hteng ne a pyien ah phäh ah Roma shangpughang Constantus noh Christu kum 356 ung Hilary cu khaw pung ah a täm ah kya ci. Khaw pung ah a om yah ung Taigü Mâng Hilary cu Shing k’thum Khanpughü tu mat bäng om ci ci a mong cu ca uk tu mat ah kya lo khai ah guk ne pyang ciah kya ci. Bä ciah Hilary cu Christu kum 361 ung Poitiers mânggo ah hteit ba ne a shi nak ah kum ah ciah kya ciah Christu kum 367 a chüt hleih Catholic yumtu ng’bum ah yum nak cu ghung ne m’htei ciah kya ci. A ni cu hngip hngäi ne k’chang gui ah khan ah m’lung ni hta ne yum tu k’bum cu a cum ah ghung ciah bä ciah k’chang tumat ah kya ci.
A ni cu Khanpughi lam ung hnguh hmat k’chang gui ah kya ciah Theologians gui lah hnguh hmat nak gui ng’thei ng’thang ci gui ah k’chang gui ghung m’htei ciah bä ciah k’chang tu mat ah kya ci. Bä ciah Hilary ah ghünlu mi teng a kya ung a ni cu Catholic yum tu k’chang ah a kya lo ung tün ne a yum nak ung khäng hleih a om ah hlo ah a k’cum a k’täih ah m’hteng ne a k’tung pi ah Boi Yesu Christu ah Khanpughi a kya nak cu kyüih kyok nak kä om ein hleih m’hteng ne ghun ci ci-cu mi hnguh ciah kya ci.
