Papa Shangpughang ah ng’thu
Hnguh hmat mâng k’chang gui ah poi a ng’päng kon ah lo ciah kyün hngü cu Boi Yesu a ng’tüi nak ah hngün ng’päng ne yum tu ng’bum ah k’hngüp ng’neng lah kho kum k’thai a tün nak ah kya ci. A shin ah hngün ung mi mi gui am Khanpughi a täng ah mi läk vai, Khanpughi ah ng’thu k’ni mi ng’ngaih vai lah mät ah ng’phei ng’et nak ah k’chang gui ah khan ah Khanpughi ah m’hngi nak gui thei bang tu vai ah kya ci ci-ne pyein ci. Jordan tui ung Boi Yesu no m’shi nak a ci tu cu mi mi gui tumat hti am Christian k’chang ah a na kya hlak gui, kat nak ung ka a na k’pyhon nak gui lah Khanpughi ah hngün a na peit nak gui ah Muh htithein ah m’yungaa awn Khanpughi ah hta k’hngu hta k’pa ah a na ng’thong hlah hlak gui ci-ah k’chü khän nak gui shüm ba ne ng’pyantham ba vai ah a na chü thäm gui ciah kya ci.
Khanpughi cu mi mi gui ah ghünlu gui, mi k’hmaleim gui lah mi ng’ngaih u nak gui kä na ton ein pe gui ne kya ciah Khanpughi ah kä kya ci. Khanpughi cu k’chang ah kya nak ci-ah ng’thu k’ni hnguh shim nak awn mi mi gui ah ng’lung ah om ne k’chang gui a van ka vai ah cäicat vai awng ah a m’hngi nak tumat ung na chükong gui ciah kya ci. M’shi nak cu mi mi gui tumat hti am Khanpughi ah Pakkhui k’chang, k’chang pakkhui päng lah Thung yo päng ah hta k’hngu hta k’pa awn ng’cumboi ciah kya ci. Khanpughi a na peit gui ah däm ciah a cun ah letsawng cu shüm ba vai ah kya ci. M’shi nak cu a k’hngüp nak ung ka no a k’khang nak ah kya ci. Ghünlu ung buiawt ah kä ng’kot ng’gei nak gui ung na m’ät ba gui ne shi lo ung Khanmopi luh nak ah m’kot ah kya ci ci-ne na m’thei m’cäi gui ci
