Bä ciah Leonie Aviat ah ghünlu a mòng

Bä ciah Leonie cu Christu kum 1844, September k’cha 16 hngüp ung Pyinhtit kho Sezanne ung ng’tüi ciah kya ci. A nu pa no a ni cu ng’büh ng’mang k’chang awn khhawngkhui a khoi vai ah a ni ng’yak hlü man te ah kya ci.A ni ah ng’müi m’cha lam ung htingling ne a ng’phät nak cu Troyes ung om ciah Yahteih kyawng ung ka no a gah tu hnging ah kya ci. A ni cu a cun ah Yahteih kyawng ah a om tu yah ung Francis de sales ah hlüngtai nak no a m’lung k’nga  k’chüp hleih a ni ah ghünlu ung a k’ni ah gah ci ah kya ci. A cun ah pyantham ng’thonghlah nak a kyäp kyäp ah gah ne k’hngumi hta gui hlui hlak gui a mi tah nak ah setyung ung a kya ah duyai ne a mi bi loh man gui hngu ciah kya hleih a ng’htoi tumat m’düih hnging ciah kya ci. A cun ah ng’htoi cu Salatian ah ng’müi m’cha lam ah ghünlu a ni ah läk ne om ne k’hmo k’tho gui hluihlak, yih gui a k’ni ah a mi shuuntah lo thei vai ah m’thei nak lah Khanpughi ah mong lam thähla ne a mi m’thei m’thang nak gui vai ah kya ci.

Christu kum 1903 ung Pyinhtit kho ung om ciah yum nak lam ng’hngu ng’tuk nak ah u pa htei a phäh ah yumtu ng’bum cu kho phung a mi got täm ah kya ci. A ng’htoi ah k’tung pi ah u pa tei gui cu Christu kum 1911 ung Papa Shangpughang Pius 10 no a k’ni ah a k’bäi peit ah kya ci. Leonie cu a ng’htoi ah bi loh gui a k’ni ah a aungtang lo vai ah Mother House cu Italy ghunkho, Perugia ah a k’plon ah kya ci. Leonie ah a bi loh gui a däm lo cu Pyinhtit kho ung ka no Italy kho, Mmaxico lah kho m’dek pum a van ung yat yop ciah kya ci. Francis de sale thei bang tu ne k’chang gui a mi yei kyai hnging vai ah bi bi ciah kya ci. “ mät no mät kä shüm ein ba ne k’hmih vai” ci-ah a ni ah a m’lung a phukpit cu läk ne om ciah kya ci. Bä ciah Leonie cu Christu kum 1914, January k’cha a hngüp 10 hngüp, A kho kum 69 ung Italy ghunkho, Perugia ung shi  ciah kya ci. A ni cu Christu kum 2001, November k’cha 25 hngüp ung Papa Shangpughang a k’hngih nak John Paul no Bä ciah k’chang ah kya ci ci-ne yumtung’bum am a m’thein m’kan ah kya ci. A ni cu ca m’thei ci gui ah Saya, Sayamah gui lah Oblate Sisters of St. Francis de Sales ng’htoi lah a m’shah ng’htoi gui ghung m’htei ciah Bä ciah k’chang tumat ah kya ci.