Bä ciah Ramond ah ghünlu a mòng

Dominican ng’htoi ah a k’thum nak ah vai pi ah kya ciah bä ciah Remond cu Christu kum 1175 ung Spain ghunkhaw, Panya (Penafort) Manggo ung ng’tüi ciah kya ci. Hnguh shim  nak gui ung ghuih ciah kya ne a khokum 20 ung Pinbasilo Mânggo ung ng’ngahtüh ne hnguh hmat nak gui a mong ah kya ci-ah Phylosophy cu leng ne m’thei m’thang ciah kya ci. A kho kum 30 ung yumtu ng’bum ung läk lam vai gui ah kya ciah Cannon Law awn ng’toi hleih poih k’hngih gah ciah kya ci. Pyam ciah  k’chang gui ah k’khan ah ng’khai ne m’hngih nak awn ghunhtot ne bi bi ciah kya ci. Christu kum 1219 ung Taigü Mâng khem ciah Deacon ah kya ne bi bi ciah kya ci. A cun ung ka no kho kum k’thum be lo hleih Dominincan ng’htoi ung lut tu ne Judea pakkui k’chang gui a mi m’lung k’nga a ng’thong hlah vai ah leng ne bi lo ciah kya ci.

Muslim gui ah k’kaa ah om ci gui ah thong khui k’om gui a mi pyhon nak vai   ngui pe ne a mi lot nak ba vai ah phäh ah (The Blessed Virgin Mary of Mercy) ng’htoi cu Bä ciah Peter Nolasco awn ng’toi ne m’düi ci goi ah kya ci. A cun yah ung bä ciah Ramond cu Cannon Law ng’cut ca uk k’däm k’hma guk hnging ciah kya ci.  Kat nak gui a pyhon vai ah  Duyai ci gui no k’chü m’gein nak a mi ng’huipa nak cu Papa Shangpughang no a peit tu gui vai ah ng’shang ci. Christu kum 1238 ung Bä ciah Remond cu Dominican ng’htoi ah a k’thum nak a ng’vai pi ah kya lo khai ah a mi ghü ah kya ci. A ni ah Boiphaya gui ah om nak ah a kho awn htiet ne om tu ne, a ni ah, ng’müm’cha lam ung a kho mang gui ah a hto k’shäm hta gui am a k’ni ah läk lam awn a mi om vai lah hnguh hmat nak ah ca gui yum m’hngi ne Khanpughi ah mong lam bi loh nak ah ghünlu phih a mi m’hngi htei vai ah m’lung nga a mi m’lung k’kyong ah a om kheng geng vai ah m’thei m’cäi gui ciah kya ci. Bä ciah Ramond cu a kho kum pyha a be nak Christu kum 1275 ung shih ciah kya ci