Papa Shangpughang ah ng’thu

Boi Yesu ah ng’tüi om nak ah Christmas ah yeikyai nak no mi maa lam ghünlu ng’däih k’tha na pe gui hlä. Papa Shangpughang no“ K’chü cu k’chang ah kya lo tu pyi ci. A ni no na om püi gui hleih a Pa ah a Hta tumat bäng ah a kya nak ah hlüngtai nak lah ní cang nak awn a be nak gui cu mi hngu tu ci” Jn 1:14 ci-ah Bä ciah John ah k’chü m’kha ng’thu k’ni ung ka awn va m’tung täng ba ne Christian k’chang gui ah ng’ngaih u nak cu k’chang gui no a k’ni lam hgnuh nak ka  a mi ng’ngaih ah k’khan düit ung ng’hlüh ci-ah kä kya ein hleih mi hteh ah mi ghünlu lam mi hteh nak k’chang gui am phih k’pai tu ne Khanpughi ung ng’hlüh ne ng’yung nak vai ah kya ci. Mi mi gui ah ng’ngaih u nak cu mi ghünlu ung Khanpughi ah bi bi nak ung khang ba ciah kya ci. A cun cu Khanpughi ah bi ah kya ci. A cun ah kya hleih mi mi ah ng’ngaih u nak cu k’chang ah kya ne kä ng’kyüm be nak ung Boi a kyum lo ah phäh ah a k’khang nak cu mi gah ba ciah kya ci.

Khanpughi lah k’chang ah kya nak k’hngih awn mi mi gui cu k’chü khan ne mi gänap ciah kya ci. Khanpughi am k’chü khan nak cu Boi Yesu no k’chang ah kya nak ci tu ung ka no mi mi gui ah k’tha nem nak cu a ni ah om nak vai ah a ghü ah kya hleih mi mi gui cu Boi Yesu ah k’chang ah kya nak ung ka no leng ne a í hok cha Boi Yesu ah mong mi ng’ngaih cu mi ng’ngahtüh ba vai ah hlü ci. Mi mi gui ah ng’müi m’cha lam lah mi yum nak gui phih a k’cum ah mi ng’ngahtüh ne mi mät no mi mät mi ng’shi k’ca ba vai hlü ci. Boi Yesu cu mi mi gui ah k’khan ah om ne a van ng’kyüm be ne hlak ciah Khanmopi ah om ciah kä kya ci. Mi mi gui ah pei ah om ciah dídam loi ciah kho m’dek ah k’khan ah om ci gui ah mi phäi na nu ba gui ah hmai ung om ne a mät no a mät na m’dang gui ciah Khanpughi ah kya ci ci-ne Papa Shangpughang Leo no pyein ciah kya ci.

Sorce: Vatican News