Bä ciah Sylvester ah ghünlu a mòng

Bä ciah Sylvester cu AD 280 ung Roma Mânggo ung Khanpughi a kya ah yumäp ciah nu pa ung ka no ng’tüi ciah  kya ci. A ni cu a nu pa ah hlo ah a ghünlu ung Khanpughi a kya yumäp ne ng’vai lo ci ah kya ci. A hei Christian k’chang gui ah khan ah phih htitheing nak lah k’chang gui am a k’ni hta ah m’ei m’ok ne a do nak gui ung k’chang gui no a k’ni ah a mi hmat lo ah kya ci. Maha Constantine Shangpughang no yumtu ng’bum am freedom a peit kon ah kho kum ät sho lo hleih Christukum 314 ung Bä ciah Sylvestler cu Papa Shangpughang ah kya lo ci. Papa Shangpughang Sylvestler yumtu ng’bum uk ne a khong mang yah ung Arianism m’shuuk kya ne Boi Yesu ah Khanpughi ah a kya nak a k’ni ah m’thei m’thang ne a mi m’dang nak ah Christu kum 325 ah The Council of Nicaea a mi ng’bum nak yah ung kya ci. Constantine Shangpugghang ah a ng’ming thang ciah a peit tak gänap nak cu om man ciah kya ci.

 Roma ung Christian yum nak lam a ng’thong hlah lo hnging vai ah St. Peter lah Lateran ung St. John phaya kyawng nu goi lah a hei phaya kyawng gui a k’daa cu Ekaret Constantine awn ät ne co ci goi ah kya ci. A ni ah gänap peitak cu yumtu ng’bum a kalu nak ung ka no a mi lot vai ah a ci lah Vatican ung St. Peter lah Lateran ung St. John phaya kyawng nu goi ung k’taigü hlü ci gui no a mi ng’ngaih ah a mi k’taigü nak vai ah phäh ah a ci peit gui ah kya ci. Bä ciah Sylvestler cu Benedictine ng’htoi ghung m’htei ciah bä ciah k’chang tumat ah kya ci.