Bä ciah Egwin ah ghünlu a mòng
Bä ciah Egwin cu 7 Century yah ung hlüng tai ciah k’kyawng khui ung ka no ng’tüi lo ciah kya ci. Taigü ng’htoi ung lut tu ne Taigü tumat ah kya lo tu ne Englang ghung kho Wocester ah Taigü tumat ci ne Hlüngtai ciah a pakk’khui k’chang gui, Taigü Boi gui lah mânggo k’om gui no a kya ah yeii tu ne a mi do ah kya ci. A ni cu Taigü Boi ah a kya ah hlo ah hmei hta gui lah hmei nu gui a k’ni ah ghung m’htei ne kya ciah taga nak awn be ciah hlukyi ci ne k’chang van no a hmat man ah kya ci. Cun tu pang ah phih Taigü Boi Egwin cu Taigü Boi no a cun ah a mi yei nak m’khah gui cu vam neng u ne kä ngak tu ci gui ah kya ci. A ni cu a kya ah m’hteng ci ah läk lam gui awn k’chang kong mang hlü ci te a kholä ah a mang nak hlü awn ni ciah ng’shei ci ci-ne a mi puk ah kya ci. A cun ah Taigä Boi gui no a mi puk nak daa lo hleih Bä ciah Egwin cu a kya ah m’lung k’she lo ne Papa Shangpughang Constantine am hteit ne m’thein kan tu hleih Papa Shangpughang no a cun ah a mi puk gui cu kä cang ci ci ne pyein ci. A ni cu AD 693 ung ka no 711 ah chüt hleih England kho Wocester mânggo ah Taigü Mâng tumat ah kya lo ci.
England ung a kya ah a ming thang ciah Benedictine kyawng gui ung tumat ah kya ciah Evesham Abbey Yahteih kyawng cu m’düih ciah kya ci. A ni cu AD 717 ung shih hleih Evesham Yahteih kyawn ung a mi k’phuh ah kya ci.
