Bä ciah Yohan (Boi Yesu ah Hluläk ng’shä) ah ghünlu a mòng
Boi Yesu ah m’hngi k’chang ah kya ciah a hlüläk ng’shä ah kya ciah ng’thu k’ni guk ciah Bä ciah Yohan cu Zebedee ah hta St. James the great ah a na ah kya ci. Galillee tui k’büm ung a ni ng’phäi na a ni pa awn a täng ah ng’hlek’ko ah k’khan ah ka no ng’vai a ni pyan yah ung Boi Yesu no hngu goi ne a hngu a ni läk vai ah a chü goi ah kya ci. Ngani no phih a ni pa lah ng’hle k’ko nong ghüt ni ne a k’ten ah Boi Yesu ah a hngu ah läk ci goi ah kya ci. (Mateu 4:22). Boi Yesu no ngani ah a ni ng’ming k’thai Son of Thunder ciah a hlui goi ah kya ci. Bä ciah Yohan no a guk ah a mong k’däm ghalei k’thum, a mong ng’pai m’kulei k’chüih (13:27) ung Yohan cu Hluläk ng’shä gui ung a k’hmo pi ah kya ne a mät no a mät Boi Yesu no a m’hngi ah hluläk ng’shä ci ne guk ciah kya ci.
Bä ciah Yohan cu Boi Yesu a mik hmai a ng’thonghlah lo yah ung hngu ciah Hluläk ng’shä ah kya ne, Boi Yesu kä shi pha mü ei a mi ei nak ung Boi Yesu ah k’coi ung om ne Boi Yesu yoi khai ah k’chang cu a u ang ci ne ng’shi ciah kya ci. Boi Yesu shing m’kang k’tung ung a mi ngon yah ung phih Hluläk ng’shä gui ung Yohan a mät hta bäng vah shing m’kang k’tung k’kaa ah om ne hlüngtai pi ciah a bi loh vai ah kya ciah Khanpughi ah Nu Maria a m’htei m’hta vai ah Boi Yesu no tavon a peit ah kya ci. Ngoiä shüm lä vai gui ah a mòng gui ung Nu Maria Khanmopi ah a mi kai püi a mong cun phih a ni no a hnguh hmat ah kya ci. A ni cu AD 49 ung Ephesus Mânggo ung om ciah kya ci. Cun ung ka no Mik-hnguh a guk nak ah Patmos k’pyha ng’tang ung khophung a mi gotdäm ah kya ci. A cun ah k’pyangtang ung kho kum goi a sho lo kon ah Ephesus mânggo ung htei ba ne Khanpughi lam ah k’ph,an ah ng’thu k’ni k’thum cu guk ba ciah kya ci. “ M’hngi nak cu Khanpughi ung ka om lo ci, Khanpughi cu m’hngi nak ah kya ci”1 Yohan 4:7). A ni ah yum nak lam ung yeikyai vai a mong gui cun phih Ephesus ung a guk ah kya ci.
A kho kum däm lo ne ghü ng’vai lo hleih a ni ah hto ng’nong yum tu k’chang gui am a pyein cu “ Ka m’hngi gui ah ka hta gui aw, tumat lah tumat m’hngi tu ng’kyu vä’ ci ah ng’thu ni ung om ci awn a k’cum ah m’cäi gui ciah kya ci. A hto ng’nong gui no a í ah kya hleih shin ah ng’thu k’ni a k’cum ah na pyein ciang?” Ci-ne ng’shi u hleih “ A í ah kya hleih ci ung ng’thu ni cu Khanpughi mät ah kya ci. A vai hlü ah nang mi no a cun ah na mi läk ah a kya ung nang mi ah phä ah a van ng’kyüm be ne hlü ci a í kä om ba khai” ci ne m’shang ba gui ciah kya ci. Bä ciah Yohan cu Christu kum 101 ung Ephesus mânggo ung shih ciah kya ci.
