Kanty Mânggo ung ka Bä ciah Yohan ah ghünlu a mòng

Krakow tekahto Pamokk’khah ah kya man ciah Bä ciah Yohan cu Christu kum 1390 ung Poland ghunkho, Kanty mânggo ung ng’tüi ciah kya ci. Taigü Boi ah a kya lo kon ah Krakow om ciah a phan k’chang gui am kho m’dek lam hnguh hmat nak gui bäng ah kä kya hleih ng’müi m’cha lam ung hnguh hmat nak gui phih a mi hnguh hmat lo tu vai ah kho kum a k’daa ung m’thei m’thang gui man ciah kya ci. A ni cu kä cang ciah ng’ngahtüh yum ne läk gui a van m’dí vai ci ne a phan k’chang a hluläk gui am pyein ne a cun ah ci nak ung li l’chim gui ah kä kya ein hleih hngiphngäi nak lah m’hngi ng’gei nak mang ne na mi bi vai. Ghatghum nak gui ah a kya ung na mi mät ah ng’müi m’cha vah ning m’dí pe gui khai ci ne m’cäi gui ciah kya ci. Bä ciah Yohan cu läklam vai gui a k’ni ah ng’shing khai ah khong mang ne ta mä a m’lung m’yo m’nem ne phah kä om ein ciah k’pe ah k’khan düt ung ip ne, meh phih kä ei ciah kya ci.

A kyähla a gai gong vai ah a ng’ngaih nak vai ah pyein u hleih ei ok lam ung kyünhloi ne om ciah kya ci. Kho k’hngüp ä tung Yohan cu buh ei nak ah a om yah ung ng’yoi ne ei ciah k’chang tumat a ni ah im khe ne hteit hleih hnguh ne a k’teng ah a ni ung om ciah ei ok vai gui la ba ne duyai ne ng’yoi ne ei ci am pe ciah kya ci. Cun tu pang ah phih Yohan buh a ei nak ah gok ba hleih cäicat vai aung ah a ei nak ah pakan ung buh a k’be ah a na om ba hleih hngu ciah kya ci. A ni ah tekahto kyawng ung phih duyai k’chang gui ka vai ci ne a shäng shäng m’ei m’ok nak bi hti ciah kya ci. A cun ung ka no a kya ah m’nai vai ah Taigü Boi tumat ah kya ne Taigü kho ngäng khai ah Olkusz ung a mi tüih ah kya ci. Christu kum 1473 Christmas do nak ah mü ung a ni cu Khanpughi no a hngun a lak ba ah kya ci. Papa Shangpughang a ghalei k’thum nakClement no Yohan cu a mät no a m’thei m’thang ah hlo ah läk ne ghüng om ciah k’chang k’ä gui awn a täng ah hlüngtai ciah m’hlüng tai ne vai ah chin ci ci ne pyein ciah kya ci.