2025, December k’cha 21 hngüp ung Mindat Mâng kho, Cüihkheh hto ng’nong gui no Taigü Mâng k’thai do nak
****************************************************************************************************************************************************************************************************
Mindat Mâng kho, Cüihkheh hto ng’nong gui no 2025, December k’cha 21 hngüp, Adventu a k’phli nak kyün hngüp ung Taigü kho ung om ciah yumtu ng’bum gui awn ät ne Taigü Mâng k’thai cu do ci gui ah kya ci. Nayi m’chin gha ung ka no leng ne k’cho thung yo htum k’khon nak lah ng’äi ng’om nak awn do ne Taigü kho k’ngäng Msgr. John Om Se no ng’bum im m’kot ung ka no k’chüt ng’ui awn ng’bum im k’kyong ung a mi m’hluh u ne Missa gänap nak ung Taigü Mâng k’thai Augustine Thang Zawm Hung no khong mang hleih gänap ci gui ah kya ci.
Mindat Taigü Mâng ah Khanpughi ah ni bä nak ka phäh ah a shüm hmat nak ba lah m’cäi m’thei nak ung Mindat Taigü Mâng kho k’tai lah Taigü Mâng k’thai gah cu ng’htei ah Khanpughi ah ni bä nak ah kya ci. Mät ah kho lek ah k’khan ah mät ng’düih vai leng ne mi pong lo hnging cun phih Khanpughi ah keisu ah kya ci. Khanpughi no ngoiä chüt na m’htei gui ne hlü ciah k’tha gúi gùi a no peit ng’däih gui vai ah phih a k’cum ah mi k’taigü khai ah kya ci. A k’phli nak ah Aventu kyün hngüp ah kya hleih k’chang gui Kat nak ung ka no k’pyhon khai ah ng’tüi lo khai ah k’pyhon ciah Boi Yesu cu kä sho pha hleih ng’tüi om lo tu khai ah kya ci.
Ng’thu ni ung ng’yak ah mi mi no kat nak ung ka k’pyhon nak mi gah tu hnging vai ah Khanpughi ah k’chü ng’ngai ne äi ci goi ah k’chang k’hngih om ciah kya ci. A cun goi Nu Maria lah Bä ciah Joseph ah kya ci. Ngani no “ä” ci ne a ni pyein ah k’chü ng’lung awn mi mi hmakat nak ung ah na k’pyhon gui ne Khanpughi awn a ni na m’chum ba gui ah kya ci. Nu Maria no Khanhtapup Gabriel gok lo ne k’pyhon ciah Boi Yesu a ni ung ka no a ng’tüi lo tu vai a mong pyein hleih a ni cu a läng k’chang k’hngumi hta ah va kya ciah kya hleih kä kya hnging khai ah ng’ngai te ci. Cun tu pang ah phih Khanpughi yumäp ne a k’chü a ng’ngaih nak awn “ Kei cu Khanpughi no a na phan vai ah ka om ci. Boi no a pyein ah hlo ah kei ung kya hlä” ci ne Luk 1:38 ung m’shang ba ciah kya ci. Bä ciah Joseph ah phä ah phih k’phon ca Boi Nu Maria ung ka no ng’tüi lo khai ci ne Khanpughi ah ng’shä Khanhtapup no a m’cäi ah hlo ah bi Khanpughi ng’ngai ciah kya ci.
Mi mi k’chang gui a ng’däi ah ghün nak mi gah tu hnging vai ah cu Nu Maria lah Bä ciah Joseph no lam a ni na k’hmon peit gui ah kya ci. Maapi k’bäih ne ng’yak nak ung Prophet Isah no Juda Shangpughang Ahaz ah hteit ne Khanughi ah m’yungaa gui a m’dang vai ah tumat mat hlok nak shan vai ci ne pyein hleih Khanpughi kä yum ne kä shang ci te a k’hnguh ah a ni cun phih Khanpughi yum lo ne a cun gui cu do hnging ne Khanpughi a yum nak a m’dang lo cun phih om ciah kya ci. Cun yah ung Israel kho cu htum lah hliip ci-ah k’hngih ah ng’pai man ci goi ah kya ci. Isarel cu hliip lam ah kya ne Juda cu htum lam ah kya ci. A cun ah ghunkho mong lam ung ng’gen am nak gui a om lo yah ung k’ce ng’shä Isah no Shangpughang Ahaz am k’chang kä ng’ngai u ein ne Khanpughi bäng a ng’ngaih u vai lah Khanpughi om ci ci-cu shang ne na m’dang hlak vai ci ne pyein ciah kya ci. K’chang ah hlüngtai nak lah k’chang ah m’chüt näng nak düt ng’ngaih u ah a kya ung a k’hnguh ah k’chang ah k’kaa ah om ne k’chang ah phan k’chang düt ah kya hnging ci cu Shangpughang Ahaz a mong mi ng’yak no na m’thei gui ci. A cun ah hlo ah Khanpguhi ng’ngaih u ne a ni yum äp ah a kya ung Khanpughi no na m’htei hleih hlüngtai nak gui, m’chüt näng gui cu gah vai ci ne Nu Maria lah Josep no na m’thei gui ciah kya ci.
