Jerusalem mânggo ung ka Bä ciah Sabas ah ghünlu a mòng

Sabas am a k’hmät hlüngtai ci ci ne a mi chü ah kya ci. A ni cu Cappadocian k’chang ah kya ne kho kum 90 khei ciah ghünlu awn Boi Yesu ah mong lam bi ne gänap ciah kya ci. kho kum gha khei Yahteih kyawng ung om ne ta a kho kum 18 ung Jerusalem mânggo ah htei ne Christian ng’bum ung a kya ah k’tha na ne bi bi ne ta kya hleih k’chang gui no a kya ah a mi hmat lo ah kya ci. A kho kum 30 be lo hleih Than hngah awn down gui hlak ne ku ah k’kyawng ah läk lam gui awn k’taigü ne om man ciah kya ci. A nu pa no Yahteih ghünlu a nong vai ah pyein ne kya u hleih dam ciah kya ci.Cedron tui läk ne hlalai maa ah hteit ne ta a mät ta khokum phli peng peng läklam gui awn k’tha na ne k’taigü ciah kya ci. A cun yah ung k’chang shing 150 hlok a ni ah lo ne ng’pong lo tu ci gui ah kya ci. K’chang a k’daa ah k’nga k’phlang nak awn Sabas cu Christu kum 1941 ung Taigü Boi ah kya lo tu ciah kya ci.

Hmei nu ah kya ciah a nu no a hta ah om nak ah htei ne seiyung gui lah k’chang gui ah ng’dü ng’tang nak vai gui co ciah kya ci. Sabas cu Constantinoble a shäng a hteh yah ung Ekaret mâng Anatasias ah m’kot k’ngäng no a ni am ng’yoi ne ei ciah k’chang ah ng’ngai ne a hlot ah kya ci. Cun tu pang ah phih a ni ung a luh nak tu hnging vai ah ca ng’shäm lo ciah kya hleih lut tu ne a cun ung Khanpughi ah mong lam gui thähla m’thei m’thang ne om ciah kya ci. A khokum 90 be lo hleih Constantinoble ah hteit ba ne kya hleih Shangpughang Justinian no a kya ah yei tu ne a do ba ah kya ci. A ni cu Jerusalem ah hteit ne k’taigü ci gui ka vai im a koh vai phäh lah ga gui no a ten ah a mi tuk nak gui ung ka no a ghun nak gui vai ah kantat tu mat a coh vai, k’phlam a mi lo nak gui a k’chaak ba vai ah phäh ah Shanpughang ah k’bäi nak awn hteit ba ciah kya ci. A ni cu Jerusalem ah a gok ba kä shop ha hleih shih ciah kya ci. Christu kum 1956 ung a ni ah üm na ne shüm lä vai ah ng’kho cu Venice mânggo ung om ciah phaya kyawng ung a mi htin ah kya ci.