Bä ciah John of the Cross ah ghünlu a mòng

Bä ciah John of the Cross cu Christu kum 1543 ung Spain ghunkho, Fontivero sung ng’tüi ciah kya ci. A khokum 20 yah ung ci ah ng’ming la ne Medina ung om ciah Carmelite ng’htoi un glut tu ciah kya ci. Yaica buiawt nak kä om ein hleih om nak ah kho m’dek kä phlän ein vai ci ah a ghünlu pum a k’cum ah k’taigü man ciah kya ci. Taigü Boi ah a kya lo kon ah Albert of Vercelli ah m’hteng ciah läk lam gui awm a mät hta om ne k’tha na ciah kya ci. Christmas 1568 ung Avilla mânggo ung ka bä ciah Theresa awn a täng ah Boiphaya gui a mi mät phäh phäh om ne m’lung m’yo m’nem nak lah kyünhloi nak gui awn ng’tha nak ci gui ah a ng’bum cun phih pyang tham ba ciah kya ci. A cun ah pyantham nak gui bi lo hleih a ng’htoi ung om ciah Yahteih k’pyhüm a ng’vai tub a gui no John ah khan ah a kya ah m’lung k’she u ne pha ne thong ung a mi chum ah kya ci.

John cu Thong khui k’kyaong ah a om yah ung ng’müi m’cha lam ah yum nak gui ah ng’äi gui lah m’hngin nak ah mei ci ah ng’äi gui pyang ne om ciah kya ci. A k’hngüp nak ung ka ng’müi m’cha ci ah ng’äi  ung yaica bui awit nak gui a k’daa ah hngu ah kä na mi gok pha ah a kya ung Khanpughi ah ng’büh ng’beih ciah ni bä nak lah hnguh shim nak kä na mi gah khai ci ne a guk cu om ciah kya ci. Kho k’hngüpät ung Bä ciah crusu ah Johan no läk lam gui kä läk ci ah Taigü Boi Diego am a m’lung k’nga a ng’thong hlah vai ah k’phlang tu ciah kya ci. Cun tu pang ah phih a cun ah Boi Phaya cu a m’lung k’nga a ng’thong hlak vai kä pyein ah John cu ng’hngu ng’tuk püi ne John ah mong lam gui a k’she ah pyein ciah kya ci. A cun ah kya hleih John cu a hei ah ng’plon ne ta Christu kum 1591 ung shih ciah kya ci.