Bä ciah John Roberts ah ghünlu a mòng
Bä ciah John Robert cu Christu kum 1577 ung Gwynedd, Merionethshire, Trawsfynydd ung ng’tüi ciah kya ci. A ni cu John lah Anna Robert ah a ni hta ah kya ci. Protestant tu mat ah kya ne ng’vai lo ciah John cu Catholic yum nak a k’cum ah m’nai ne m’hngi man ciah k’chang ah kya ci. Christu kum 1595 ung ka no 1597 a chüt hleih Oxford ung om ciah St. John College ung ca ng’thei tu man te ci. A thei ng’thang tu kä ng’päng pha hleih kyawng ung ka no ng’pät ciah kya ci. A kho kum 21 ung Inns of Court ung Upahtei hnguh hmat nak ng’thei ng’thang tu ne Christu kum 1598 ung Pyinhtit kho ah a hteh nak ung Pari mânggo ung om ciah Notre Dame ung om ciah Phaya kyawng ung lut tu ciah kya ci. Christu kum 1598, October k’cha 18 ung Spain ghunkho, Valladolid om ciah English College ung lut tu ci. Christu kum 1599 ung Valladolid om ciah St. Benedict ng’htoi un glut tu hlü ne College kyawng ung ka no ng’pät ciah kya ci. Christu kum 1600 ung Spain ghunkho, Compostela mânggo ung om ciah St. Martine kyawng ung Taigü Boi ah kyat u ciah kya ci.
Taigü Boi John cu Khanpughi mong lam thähla m’theing m’thang ciah Taigü Boi tumat ah kya ne England ah lo ba khai ah Chriatu kum 1602, December k’cha 26 ung ng’düi lo ba ne Christu kum 1603 ung England kho ah gok ba ciah kya ci. 1603, May k’cha ung pha u ne ta kho phung a mi k’däm ah kya ci. Christu kum 1604 ung England kho ah htei ba ne leiget no a ci gui awn a tang ah bi bi ne om ciah kya ci. A cun ung ka no pha ba ne ta khophung a mi k’täm ba mä ah kya ci. Christu kum 1605 ung England kho ah lo ba hleih pha ne k’cha k’chüih thong ung chum ba u ne ta 1606 ung kho phung a mi k’täm ba mä ah kya ci. Kho phung a mi k’däm yah ung kho phung a mi k’täm gui ah Benedictines gui ka vai ah Douai ung im tumat a coh ah kya ci. A cun ah im cu St. Gregory Yahteih gui no a mi om nak ah kyawng ah kya lo ci.
Christu kum 107 ung England ah lo ba hleih December k’cha ung pha ba ne thong ung a mi chum ba ah kya ci. A cun ung ka no dong hleih Christu kum 1609 ung ngon vai ne a mi pha ba ah te a cun ung ka no khophung a mi got ba mä ah kya ci. K’cha a m pi sho lo hleih England ah lo ba om ne ta Christu kum 1610, December k’cha 2 ung Missa a gänap yah ung pha ba ne ta December k’cha 5 ung Taigü Boi Thomas awn a täng ah a mi ngon goi ah kya ci.
