Numaria kat nak kä om hleih a kyämah nak
K’chang gui ah k’khan ah ng’dang sha ciah kat k’tung ung ka no pyhon vai ah kho m’dek khan ah kyum lo khai ah Boi Yesu Christu ah k’pyhon nak ung cum boi tu ne bi a bi tu vai ah Khanpughi no a ghü ah k’chang ah kya ciah Nu Maria cu kat ghong awn kyämah ci ci cu yum tu ng’bum no cang hleih a yum ah kya ci. A cun ah m’thei m’thang nak cu ng’thu k’ni lah yum tu ng’ bum ah thûm gui lah ngoiä chüt shüm lä vai ah om ci gui cu ng’yung na ne Pius IX no k’chü ng’lung gui bang awn m’dang ne kä gah hnging vai ah däm ciah Khanpughi ci ne Chridtu kum 1854, December k’cha 8 ung a k’cang ah m’dang ne a thähla ah kya ci. Ng’lami hta Maria lah kho k’nget cu kä ng’kot ci goi ci cu “Nang lah na k’chu, nang ah pak k’khui k’chang gui lah na k’chu ah pak’khui k’chang gui ng’ u ng’sheih khai ah ka ci khai ci ne ( Gen 3: 15) ung a caä gei m’dang na om man ciah kya ci.
A cun ah m’dang nak cu Khanpughi ah ng’shä Khanhtapup no Maria am a pyein lo nak “ Khanhtapup cu gok lo ne na yei tu vai Maria aw, a ng’htei hma ah na bä ci nei. Khanpughi mät ning om püi ci. Khanpughi cu nang awn a k’cum a ng’däih ah om ci” ci ne ( luka 1:28) ung pyein ci. Bä ciah Elizabeth no Nu Maria lut lo ne a do nak ung “ k’hngumi gui ung nang no a k’ni pi na gah ci ci ne a pyein cun phih a kya ah khäng htek tu pi ciah kya ci. Nu Maria kat ghon awn a kyä mah ah mong, thûk ciah a mong guui cu yum nak lam ung hgnuh hmat k’chang gui ah ng’cuh ng’vah nak vai ah phih kya man ciah kya ci. Bä ciah Bernard lah bä ciah Aquinas ah kya ciah a kya ah a kya ah a ni ng’ming yum nak lam ung thang ci lah St. Dominic Yahteih ng’htoi gui nno kat mah awn Numaria cu kyä mah ci ci ne ng’ngai man ci gui ah kya ci. A cun awn ng’hngu ng’tuk hleih Nu Maria cu kat ghon awn kyämah ci ci pyein ciah Yahteih gui cun phih om ciah kya ci.
Christu kum 1854 ung Papa Shangpughang Pius IX no Boi Yeisu ah k’pyhon nak ung ng’cum boi ne bi bi tu ciah Nu Maria cu kat ghong awn kyä mah ci ci cu kho m’dek pum no a hmat vai ah a thähla kon ah k’chang gui ah ng’cuh ng’vah nak gui cu ng’düm ciah kya ci. A mi m’thei m’thang nak ah a mi k’phlan gui ah a mong cu Christu kum 1858 ung Lourdes mânggo ung Nu Maria no a m’dang nak ung ka no a mi gah ah kya ci. A cun ah m’dang nak hnguh ciah Bernadette no Nu Maria am nang ng’ming cu a u ang cu ne ng’shi hleih Nu Maria no kei cu kat ghong awn ka kyä mah ciah Nu Maria ah kya ci ci ne m’shang tu ba ciah kya ci.
