Papa Shangpughang Leo ah ng’thu

Papa Shangpughang no Jubille audience gui am a pyein nak ung gai thek ciah ng’ngaihi u nak awn a í hok cha gün vai cu Adventu no na m’thei gui ci. Adventu cu hngün ng’dang nak ci gui m’theih ne ng’ngahtüh vai ah na m’thei gui ciah kya ci. A í ah kya hleih ci ung mi mi gui ah om k’ih bi loh gui lah a k’hngüp täi mi ghünlu gui ung Boi Yesu mi hmat gui vai ah pyantham nak lah k’tha nak gui hlü hleih Boi Yesu cu mi hmat vai ah kya ci. Tüipyan nak ah ng’kyüm be nak lah a cun ah ghüthäm nak mi mi no mi günkyo cu dìm gei nak kä om ciah  kya ci. Khanpughi no a ni ah bi bi nak ung mi cumboi tu vai ah a k’cum ah na shui lei gui ciah kya ci. Khanpughi no a ni ah bü ceng nak lah a ngoi chüt shüm lä vai ah a mong gui ung na cumboi tu gui hlat ne ng’ngaih u nak awn mi ng’cut tu vai ci ne pyein ci. Jubilee ah Theme cu “ Pilgrims of Hope ah kya ci ci cu pyein ba ne Boi Yesu a ng’tüi lo nak ah Christmas ung Jubilee a ng’päng tu lang pang ah phih a cun ah Jubilee Motto cu kä ng’pyi khai ci ne pyein ci. Mi mi gui ah ghünlu pum ng’ngaih u nak awn a ng’däih ah hteit ne mi kut gui cun phih kä kep ein ne gai thek nak awn bi lo ne mi k’äih tu hnging vai ah na k’nga k’phlang gui ciah kya ci.

Hngün ah ng’dang nak gui cu k’vai. Khanpughi cu Khom’dek ah a k’pung ah om ciah kä kya ci. Ghünlu ah a k’pung ah om ciah kä kya ci. Boi Yesu a k’htük pi ah a kyum lo yah ung tün ne mi mi gui awn a tang ah om ne ghünlu ung mi ghün om nak gui ung om ci ci cu mi hnguh hmat ciah kya ci. Hnguh hmat nak awn m’lung k’kyong ka no Boi cu mi shui hnging vai hlü ci. Ni ci gui ghü hnging vai ah üp hleih om lah a kho lä ah om düt gui nong ah a lya ung kho m’dek cu ni lo pi hti khai ah kya ci. Mi mi gui ah bi loh hnging nak gui cu k’chang hei gui ka vai lah Khanpughi ah ghinkho ka vai ah mi bi ci ang? ci ne mi mät no mi mät mi ng’shi ba ko. Ng’ngaih u nak ci cu cum boi ne bi tu ah kya ci. A cun cu Khanpughi no a na peit gui ah let sawng ah kya ci ci ne Pyein ci.