Khòmdek púm kä tàgá nak gui
Kchàng gui ah kchàng hlû pèingléng lah akhò tüî pèingléng gui cuh atäng ah dí shùm ci.Mikmi cuh kchàng gui lah kchàng hlu mòòng coh ngphlài gui a dídam nak gui ah a ngyung khong nak gui kä hmat neh akhòtüî pèingléng a dídam nak gui ngkyüm bé chütgok khai gä hlêi vai cuh kä kya hnging ci.Akcàng ah pyéin ah akya ung akhòtüî pèingléng a dídam nak lah kchàng nghtòi ngkhóp ah kkyòng ah didam nak gui cuh ngploh ngkheih hloi ciah kchàng nghtòi gui vah akdá pí ah ploh kheih lo ci.Mikmi ah a khngüp tä mi bùichúm lah htikpan hnguh hmat kchàng gui ah shui ktäih neh ami hnguh hmat gui cuh akhòtüî pèingléng didam gui ah mvúk nak cuh dudong ci gui no vah akdá pí ah ami bùi hlùn ah kya ci.
Avai hlü ah pyéin ah akya ung ngá pha nak ah ngdü hngün gui akèn lo nak gui cuh ngplôn ngplap neh kä bi thêi ca ngá shùi neh yòi ca kkyòng khùi gui akchün ah ploh kheih hlak ci. Ók ei ah tui gui a thûshîn nak cuh tûi kthéing ùm gui kä k’hleih hnging ca dú khaih ci gui ploh kheih ci.Tuili nu gui a pùm lo nak cuh ami ngplôn ngplap biloh nak vai kä om ca tui kkam pei ah om ca dukhaih ci gui ploh kheih ci.Kchòkhò ah om ca dukhaih ci gui cun phih ami bi vai kä om hleih akhò hei yung ah püíyài neh ami hteh htonnak ung ami ngploh ngkheih nak gui dá lo ci. Ngthup neh ami hteh htonnak ung pha neh ami chúm gui,cói ghâ neh lam coih ah ami shih kyuk nak gui,ami hten htonnak ung mkóm mkèi ci gui noh ami lèi k’èi nak gui ciah akkhak lènglèng búi òt u neh thüi kyah ngploh ngkheih nak gui akkhak lènglèng om lo ci.
Cun bäng ah kä kya neh acun ah yáicâ gêivai ah phäh ah kkyòngkhui gui ngtáinak gui ah chüt hleih kä ni ciah amòòng gui cuh om lo ci. Kchang gui ah kchàng hlu moong kä taga ah phäh ah akhmo gui ah kya neh shi ci gui ah du khai ci gui lah khoh tang a kèncú lo ah phäh ah ngtuk ng’ah gui ah phäh ah shi ci gui,amòòng kthài gui ung kä mi mdáng ah ahei ngcuh ngcan gui ah phäh ah shi ca akdu gui akkhak om ci gui. Kchòkhò ung dú ci gui cuh aktúng pí ah Malaysia ah hteit neh nghloh ci gui. Ghunkhò ùk ca a ngkyìng k’hlùi acoyah noh lam khang hleih kkâ lam on hteit ci gui cuh lam coih ah shi kyu ci gui phih om ci. Pha neh chúm gui u hleih ngúi akdá pe neh lòt lo ba khò kshô ami mthung ba ah kkhân ah palik noh kä pha en vai dóng ghüi ghüi neh bi bi tu ci gui ah kya ci.Cun gui cuh phlän hnging vai kài lo khai acoyah cuh ghunkhò hei gui on ngpòng neh gung kum nak gui ahlü hlü on bi ung vah mchüt hnging vai kya ci.
