K’Chàng Phia k’phlikip m’bei ci.

Báwi Jesu cuh a cun-ah khàw ung-kah ng’düí lo bà neh Galilee tui-nú ’kàm-ah gok ci. Cun kon-ah, Khaw m’htùng-ah kài neh ngoh-ci. K’Chàng a ’khak ani-ah lo u nehtah a khaw k’hnget ni, a khaw ng’gúng ni, amik m’dah ni, a k’áng ni, a hei hei awn gàw-pài ci gùi cuh, Báwi-ah lo püi u chü-tah m’gái bà gùi ci. “Áng te ci k’chü bà thei ci,  a ng’gúng hteit bà thei ci, a m’dah te nawh hnguh bà ci, ci neh k’chàng a k’dá nawh cäi neh ngak nehtah Isarael pa-khúi-ah Khãnpùghí m’tam ci gùi.

Cun kon-ah, Jesu nawh a-hlu-läk gùi chü gùi neh “Sin-ah k’chàng gùi ami gein vai-ah, hngüp k’thùm púm kei awn om tu u neh i k’càng ami èi vai kä om hleih a èi ’kà-ah kä ka tüì bà gùi hlü ci. Lam-ah èi cói neh sih i-pi vai u hleih” ci ci. A-hlu-läk gùi nawh ani àm ami piéin lo cuh, “k’Chàng sin ’chü-ah phü vai sin-ah Hla-lái-ah a hôi mih hnguh hnging khai ang? Jesu nawh “Nangmi ung èi vai, i chü om ci ang?” ci hleih “m’htut, ng’lung k’chüih lah, ngá ’khùi apí om ci,” ci ci gùi. Cun kon-ah, k’chàng ng’bum gùi, m’dek ung ngoh hlak gùi nehtah M’Htut k’chüih lah, ngá htá gùi cuh, lák neh Báwi-ah bä-nák gùi m’tam nehtah m’htut lah ngá k’bo neh a-hlu-läk gùi àm pe gùi hleih ngamí nawh phih a hei k’chàng gùi a k’dá àm tei gùi ci gùi. Avan nawh a phü-ah a èi kon-ah, a k’poih a k’pì gùi, k’bah-khawp k’chüih-ah m’htäm bà ci gùi. Èi tu ci-ah k’chàng, hngumi lah k’hmó kä ’chei eìn tu-ah, k’pámi bäng k’phia k’phli-kip lo ci. Cun-ah k’chàng gùi, tüi èin bà gùi nehtah ng’hlè-’kõ ung ng’cùm neh Magadan khàw täng-ah ng’kat ci.