Bä ca Francis Xavier ah ghünlu a mòng

Ghunkhaw hei ah Khanpughü ah mong lam bi ci gui ghung m’htei gui ca bä ca Francis Xavier cu Christu kum (1506) ung Spin ghunkhaw, Pamplona maanggo ung ng’tüi ci. A ni cu Pyinhtit khaw Paris maanggo ung ca a ng’thei yah ung Loyola ung om ca Ignatius ( Ignatius of Loyola) ah mapi bäih ne a toipüi ah k’chang k’chüih ung ka tumat ah kya tu ci. Taigü Boi ah a kya nak kum phli a be nak (1541) ung India ghunkhaw ah hteit ne Khanpughü ah mong lam a thähla vai ah a mi tüih ah kya ci. Tüi lam awn cha ghaleik’thum hteit hton ne guhkhaw ah kya ciah Potugual ung om ca Goa maanggo ung leng ne Khanpughü ah mong lam gui thähla ne a cun ung om ca k’chang gui kä chin ci lah a lä ah mang nak gui ung ka noh ghung m’htei gui ciah kya ci. A cun ung ka noh cha k’hma lo lo hleih  nga pha na awn a mi ghinlu m’ghün ne tüi k’am pei ah om ci gui ah Paravas k’chang gui ah om nak ah hteit ne Khanpughü ah mong lam k’däih ne a m’thei m’thang nak ung a cun nung om ciah k’chang a k’daa pi cu m’shi nak Sacramentu khan tu hlü ki gui ah pyein u ne Taigü Boi Francis xaviour am shan lo ci gui ah kya ci. Brahman k’chang gui ah nhgu ah k’cha ghaleigoi Khanpughü ah mong lam a thähla m’thei m’thang hleih a lung nga ng’thong hlat lo ci cu tumat bäng ah kya ci.

Christu kum 1549 ung a ni cu Japan ghunkhaw ah hteit ne Japan ung gok ki gui ah a htük pi bäih ah Khanpughü ah mong lam thähla ciah Taigü Boi ah kya lo ci. A ni cu k’phep guih ne du nak ah läk lam awn a duu k’khai vai hlü ah a om cu Japan ghunkhaw ung u noh a ii ah kä hnguh tu ci vai hlü ah hnguh lo ne ng’ing hläi khai ah hlui hlak ne ghunkhaw om ghum aa k’shäm gui ah ma ah a mät noh a mät cu Potugual ghunkhaw ah Kosale ci. Khanpughü kä yum ciah k’chang gui ung Japan k’chang gui ah hlo ah a lung ni ci a u kä om khai ci ne pyein ciah kya ci.