A k’si gùi-ung-kah ghin lo bà vai-ah màwng.

Ghin lo bà vai cuh, kä zùm ci gùi a m’sah nawh k’et neh Báwi ami ng’si cuh      “Báwi-aw, a ’chú om ci cuh a htá kä om hleih a sih-ung, a nàü nawh k’chú na bà neh a ’khúi a m’sòn péit vai ci neh Moses nawh keimí kavai a guk om ci. Ng’Phäí ng’nàü k’chüih om ci. A k’htük cuh k’chu-mah neh kä htã nà tu-ah sih ci.  Hmei-nú cuh a k’hngihnák, a k’thumnák-ung lèng neh a k’chüihnák-ah chüt hleih avan nawh k’chú na tu bà u neh kä htá-ah sih zop ci gùi. A k’hngú-ah k’hngumí phih sih ci. Cun-ah kia hleih ghin lo bà k’hngüp, ngami gùi-ung-kah, a u-ah k’chú-ah kia khai-ang? A i-ah kia hleih ci-ung, avan k’chüih nawh k’chú na te ci gùi ah kia ci.

 Jesu nawh ngamí-àm piéin bà neh “Sin-ah khàw m’dek ’khãn-ah, k’chàng gùi cuh, k’chu-cèi-mah ci gùi. Sihnák-ung-kah tho lo bà ci gùi lah, Khãn khàw-ah kài khai-ah k’bäì gùi tah kä k’chu cèi-mah bà ci gùi.  A i-ah kia hleih ci-ung, ngamí cuh, kä si bà hnging ci gùi-ah kia ci. Khãn-htapup gùi-awn täng u neh Khãnpùghí -ah htá-ah kia ci gùi, ghin lonák bà-ah htá gùi-ah kia ci gùi.  A k’si gùi ami ghin lo bà vai-ah màwng cuh k’büp-ung-kah-ah màwng piéin neh ‘Báwi cuh Abraham-ah Khãnpùghí, Isaac-ah Khãnpùghí, Jacob-ah Khãnpùghí,’ ci neh ng’chünák-ung, Moses mät nawh m’dáng ci.  Khãnpùghí cuh a k’si gùi-ah Khãnpùghí-ah kä kia ci. A k’ghing gùi-ah Khãnpùghí-ah kia ci. Avan cuh, ani-ung ghing ci gùi.

Cun zah-ung, k’chü m’cäi k’süm a m’sah nawh, “Báwi-aw, a k’càng na piéin ci,” ci neh m’sàng bà ci gùi. Cun kon-ah, a i-htá phih, Báwi-ah kä ng’si tu bà dat ci gùi.