A phàn gùi-àm, ngùi pe gùi ci-ah k’chàng k’bä.
Cun-ah màwng gùi cuh, ami ng’ngaih zah-ung, Jerusalem pèi-ah Báwi gok lo ci-ah kia neh ngamí nawh phih Khãnpùghí-ah khàw cuh, om lo k’tén khai, ci neh ng’ngài ci gùi-a phih kia hleih ngamí-àm lèng neh m’tu m’täng neh piéin ci. Cun-ah kia hleih a piéin lo cuh, “k’chàng k’bä tumat cuh k’hláng-ah ghun-khàw dò khai-ah hteit nehtah lo bà khai-ah kia ci. A phàn gùi, ghà chü gùi neh ngùi tang-kà ghà pe gùi neh ka lo bà güt, hlùm m’lèi vä,” ci neh ngamí-àm piéin ghüt ci. A k’chàng gùi nawh ani cuh, ú ci gùi. A hngú-ah k’chàng tüi neh, “Ani nawh a na uk gùi vai, kä ng’zák hlü,” ci ci gùi.
“Ghun-khàw dò nehtah lo bà ci. A i-chü-ah ami hlum m’lèi hmat hlü neh, ngùi A péit ghüt te gùi cuh, chü hlak gùi ci. Mà neh lo ci nawh, “Báwi-aw, na ngùi tang-kà-awn ghà-ah hngá hleih ka gah ci,” ci ci. Ani nawh, “Bä ci. Ni ci-ah phàn-ah k’chàng-aw, kä i htá-ung nani ci-ah kia hleih pìgò ghà na kanák vai,” ci ci. 1A hei tumat lo neh, “Báwi-aw, na ngùi tang-kà cah, k’hmà-ah hngá hleih pùng lo ci,” ci hleih, ani-am, “Nang phih, pìgò k’hmà na kanák vai,” ci ci. A hei tumat lo neh, “Báwi-aw, ka hlam ung ka htûn-ah na tang-kà, sin-ung om ci. Nang cuh, k’chün k’hmà neh, kä na htin te la neh kä na géit te na sùi hti ci-ah kia hleih ka ning kiüh ci,” ci hleih, ni-àm, “k’chàng phàn k’sé, nang, na m’gàwng mät nawh ning m’cha m’làng ci. Kei cuh k’chàng ’kà-ah kia neh kä ka htin la-neh kä ka géit ka sùi ci-ah, nà hmat-ung, ka ngùi cuh, a ng’khap mah-ah, ka lák bà vai-ah, a i-ah kia hleih ngùi pu ci gùi-àm kä na k’pu ci-ang? Tang-kà tumat cä, la neh ghà om ci-àm, pe vä,” ci neh a pèi-zah om ci gùi-àm piéin ci. Ngamí nawh, “Ani-ung tang-kà ghà om-èi ci,” ci u hleih, “Nangmí-àm, ka piéin cuh, “k’chàng a tumat nawh gah hloi ci. Ani-àm péit bà mä-ah kia neh ng’büh ng’mang lo ci. Kä gah thei ci-ah phäh läí-ah, ani-ung om ci phih, lák bà-ah kia lo khai,” ci neh piéin ci. “Kä na Sangpùghang na hlü ci-ah, ka gà gùi läí cuh si zah-ah lo püi neh ngáwn vä,” ci ci.
