Khãnpùghí-ah ghin-khàw a lo vai-a màwng.

Pharisee gùi nawh, “Khãnpùghí-ah khàw cuh, a i zah-ung gok lo khai-ang?” ci neh Báwi cuh, ng’si ’ci gùi. M’Sàng bà gùi neh a piéin bà cuh, “Khãnpùghí-ah khàw cuh a ng’dáng-ah lo ci-ah kä kia ci.  Si-zàh om ci. Cèi zah-ah om ci phih kä ci vai. Khãnpùghí-ah khàw cuh, nami ng’lùng-ah om ci. Cun zah-ung, nangmí nawh k’chàng-a htá, i-bo k’hngüp nami hnguh lo hlü khai; cun kä nami hnguh khai. Si zah om ci. Cèi zah om ci, ami ci-ung phih kä nami hteh vai. Kä nami sui läk vai. Khãnmòpí lái-läp nawh vang ghù-a kah nawh vang ghù a sü-a hlo-ah, k’chàng-a htá-ah k’hngüp-ung kia lo khai. Cun tu pang-a phih, mà neh zái-cã cang khai. Sin k’chàng gùi nawh phih ani cuh, mak’khai gùi.

K’Chàng-a htá-ah k’hngüp-ung, Nawhe-ah k’hngüp gùi-a hlo-ah kia lo khai.  Noah, tui zun im-ung a luh k’hngüp-ah chüt hleih èi-awk neh k’chucèi-mah neh om u hleih tuizin mü lo hleih avan dí zop ci gùi.   A cun-a hlo-ah, Lot, a om zah-ung phih kia te ci. Ei áwk hlum m’lèi, géit kó k’piü im neh om zah te ci gùi. Cun tu pang-a phih, Sodom pigò-ung-kah, Lot, a ng’düih lo k’hngüp, zàn-mei ã hleih avan dí ci. K’Chàng-a htá, a ng’dáng lo bà k’hngüp a cun-ah kia lo khai.