St. John lateran Mang im a mi gänap nak poiDedication of St. John lateran

Roma mânggo ung Phaya kyawng k’tung k’phli ah kyak ca St. John Lateran, St. Perter, St. Paul Lah St. Mary Major ci ah k’phli a om nak ung ah St. John Lateran cu capüi ma ne a mi coh ah Phaya kyawng tu mat ah kya ci. A cun ah Phaya kyawng cu Constantine Shangpughang noh a peit gui ghüt ah khawm’dek ah khan ah Christu kum 313 ung a mi coh ah kya ne a cun yah ung Lateran ng’dü im ci ah a mi chü ah kya ci. Maapi k’bäih ne k’phoin ca Boi ah k’bum im ci ne a mi hmat man te, a k’hngu ah Yohan goi ah kya ca tuik’phum Yohan lah ng’thuk’ni guk ca Yohan ah ngäng m’htei nak ung a mi gänap ah kya ci. k’bum im mangk’kyak ung Boi Yesu ah hluläk k’chang ah kya ca bä ca Petru ah a k’taigü nak man ah kya ca shing awn a mi pyan ah mang kyak cun phih tuhchü chüt hleih üm nai nak vai ah om ca kya ci.

A cun ah Phaya kyawng k’kyawng ah Boi Yesu ah a kyä lah a hla a mi htin nak ah ghui bät cu bä ca Petru lah bä ca Polu a ni luk’ke pung awn a mi pyan ah kya ki. St.John Lateran Phaya kyawng ah a hmai lam ung a mi guk ah ca cu “Roma manggo lah khawm’dek pum ung om ca k’bum im gui ah Nu lah Luk’ke” ci ah gu ne a mi tai ah kya ci. St. John Lateran Phaya kyawng cu Papa Shangpughang ah om nak ah kya hleih November k’cha ung shin ah poi Yumtu ng’bum no a bi ba hti cun phih Papa Shangpughang m’hlüng m’tai nak, a ni ah a k’chü ng’ ngaih ne om lah Papa Shangpughang awn ät ne om ci cu m’dang nak ah kya ci. Antioch mânggo ung ka bä ca Ignatius noh a pyein cu Papa Shangpughang cu m’hngi nak a van ah a k’bum ng’htoi gui cu uk ne teng ca chang tu mat ah kya ki ci ne pyein ci.