Khãnpùghí-ah m’geinnák, a m’tängnák màwng  k’thùm.

 Cun zah-ung, ngùi k’phlám k’lók gùi ni, k’chàng k’sé gùi ni cuh Báwi Jesu ng’ngài tu vai neh a pèi-ah lo tu u hleih Pharisee gùi lah k’chü m’cäi k’süm gùi nawh lo u neh, “Sin-ah k’chàng nawh kat-mah gùi, zèi na gùi neh ngami gùi-awn vun neh èi aw tu ci,” ci neh m’suk cha neh piéin ci gùi.Cun-ah kia chü-tah Jesu nawh phih, ngami gùi-àm, m’tu m’täng neh piéin ci.

“Nangmi gùi-ung-kah, tumat kù nawh a säm te-ah Htò phiã-ung-kah, tumat a maih vai hlü-ung, a hei htò ’kõkip-lei’kõ cuh bung-ah nawng ghüt-èin neh maih ci-ah htò tumat cuh a hnguh bà güt, sùi bà vai neh kä hteh-ah om düit khai-ang?  A hnguh lo bà kon-ah, zèi tu neh pulèng-èi neh  A im-ah a gok lo bà-ung, a teih püi k’tu lah a ng’khaw k’chàng gùi cuh chü gùi neh, “Na zèi tu püi vä, maih te ci-ah htò cuh ka hnguh bà ci néi,” ci neh piéin man ci.  A cun-a hlo-ah, ami ng’zunák bà vai-ah kat kä om ci-ah, k’chàng ’kõkip-lèi’kõ-ah phäh-ah, zèi tu-a tah, ng’zu ng’zàwn bà ci-ah, k’chàng tumat htá bäng-ah phäh-ah, Khãnmòpí-ah, zèi tu vai, dá tu bà khai néi, ci neh ka ning m’thein tu gùi.

Kä cun-ung, k’hngumí tumat kù kah, a säm te-ah ngùi pheghà ung-kah, a phé a maih ung mei im k’sèng neh m’däi neh ’kiong zung púm-ah, khawh gùi k’plon k’hlèt neh a ngùi a hnguh bà güt sùi chêng geng khai-ah kä kia ci-ang?  A hnguh lo bà kon-ah, a teih-püi gùi lah, a k’píu ng’phèi püi gùi, chü gùi neh na zèi tu püi vä, maih te ci-ah, ka ngùi-phé, ka hnguh bà ci néi, ci neh piéin man ci. A cun-a hlo-ah, ng’zu bà ci-ah k’chàng tumat bäng-ah phäh-ah, Khãnpùghí-ah Khãnhtapup gùi mah-ah, zèi vai, dá tu bà khai néi,” ci neh ka ning m’thein tu gùi ci.