Khanpughi ah ghün kho ung chü gui.
A kong ät-ah ng’hngãn ci gùi-ung, tumat nawh cun-ah k’chü ng’za neh “Khãnpùghí-ah ghin-khàw ei-áwknák-ah béit tu cuh, bä ci,” ci neh Báwi àm piéin ci. Cun zah ung Jesu nawh Pharisee k’chàng gùi-àm piéin neh k’chàng tumat nawh ’chin ei sòng neh a k’dá chü-thäm gùi te ci. Ei áwk gé vai-ah kia lo hleih phàn-ah k’chàng tüì neh ‘avan ng’kiüm pi ci néi’ ci neh a béit tu gùi te cuh a chü hlak gùi. Ngami läí nawh ami ng’sot zop-ah màwng piéin neh k’chü m’hlán ci gùi. A k’htük nawh, “Kei khàw m’dek ka k’hleih ci, hteit neh ka teng vai-ah kia ci. Kei na nong-èin-ä,” ci neh ng’huinak ci. A hei tumat nawh, “Kei van-tàng ng’kiüm k’hmà ka k’hleih ci. Tuh-bäih ka phàn süm khai-ah kia ci. Kei na nong-èin-ä,” ci-ah ng’hui-nak ci. A hei tumat nawh phih, “Kei ka ’chu-mah thài ci-ah kia neh kä ka lo hnging khai-ah kia ci,” ci neh ng’huinak ci.
A phàn-ah k’chàng nawh lo bà neh a Báwi-àm a m’thein bà zop. A Báwi nawh phih, a m’lung se lo hleih a phàn-ah k’chàng-àm, pigò lam hlòm gùi-ah, k’sèng neh na hteh vai. A k’dú gùi ni, ng’gúng khèm ci gùi ni, amik m’dah ci gùi ni, a kaw k’zùng gùi ni cuh na khah lo püi gùi vai ci neh a m’cäì. A phàn-ah k’chàng nawh Báwi-aw, na piéin te-a hlo-ah, ka ci pi. Ngoh omnák vai, kióng-èi bà ci, ci neh m’thein hleih, Báwi nawh m’sàng bà neh “Lam gùi-ah hteit neh ami ng’vòng gùi phih, zun neh ka im-ung bé khai-ah, k’chàng na hnguh gùi phùng, líng neh na m’hluh tu gùi vai. A i-ah kia hleih ci-ung nangmi-àm ka piéin cuh a k’htük-ah béit tu te-ah cun-ah k’chàng gùi-ung-kah, tumat phih kei-ah èi-áwk kä zóm tu khai gùi,” ci neh a m’thein gùi.
