Bä ciah Charles Boromeo ah ghinlu a mong

Bä ciah Charles Boromeo cu (1538) October 2 ung Italy ghunkhaw Arona manggo ah ng’tüi ca kya ci. A khokum m’kumleigoi ung a pukho ah kyak ca a k’phli nak Papa Shangpughang Pius noh Milan manggo ung Cardinal lah kaingchuk k’taigü mang ah kyak khai ah Charles cu a k’hmoh ah kya ci. Council of Trent a pyü ah chüt ah khawngmang ne a mi k’bum nak ung a mi pyeinhlak gui cu a k’ni ah ng’pyü ng’päng khai ah bi lo ca kya ci. A ng’shong yah ung a ni ah om nak a htahtana ung om ca Parish gui ung hteit hton ne a cun gui ung om ci gui ah ng’taigü Boi gui am Khanpughü ah monglam gui chang gui am a mi m’thei vai ah pyein ca kya ci. A ni cu htahtana päing ng’taigü boi ah kya lo khai gui no ca mi ng’thei nak cho ca kya ci. Bä ciah Charles cu shoh ah lo ne a k’ni ah kä ng’hta ba thei ah chüt hleih a ni ah Khanpughü a mong a m’thei m’cäi cu chang gui a phäh ah a ng’htei ah ni ne bä ca kya ci.

 A ni cu yumtung’bum ah biloh gui ah k’taigü nak gui cu a k’ni hta ah läk ne a k’taigü ung phih kyäp kyäp hta ah a m’lung kyong ah ka no Khanpughü awn ng’pong ne a k’ni hta ah k’taigü ca kya ci. A ni ah biloh gui cun phih a k’ni hta ah ng’khäm ne ng’hlihläi be a bi gui phung a ng’dot ah ng’päng khai ah bilo hnging ca kya ci. Christu kum (1576-1578) ung Plague yoka om lo hleih a shümko ah a khoh htang gui lah yumtung’bum ah khoh htang gui yoitu ne dudong ki gui gunghtot gui ca kya ci. A ni cu ng’taigü Boi gui a van cu a mi m’khamu a mi htei vai ci lah kä khin ci gui ah k’taigü Boi gui cun phih a pung ah tüih ba gui vai ci ah läk lam vai gui pyang ca kya ci. khaw k’hngüp ät ung Cardinal Charles a k’taigü im hta ung a k’taigü tu yah ung a cun ah läklam gui ka läk hlü ca ng’taigü Boi tumat no hleihnget awn kap hleih a kyä kä chuh neh a hluihlak düt a k’chuh cu cäi vai ah hnguk ki gui ah kya ci. Bä cia hCharles cu Christu kum pyaghalei k’hma lah chüitkip lei k’phli (1584), November 3 a khokum phlikipleik’hma ung shi ca kya ci.