Bä ciah Marcellus ah ghünlu a mong
Bä ciah Mercellus ah a ng’tüi k’hngüp lah a ng’tüi nak cu a ng’shing ah a u no kä hmat ciah kya ci. AD 298 yah ung Italy ghunkho, Tangier ung om ciah Strait of Gibraltar ung Roma Ekaret Maximian Herculeus ah a ng’tüi nak k’hngüp ah poi a mi bi nak ung Marcellus a phäh ah buiawt nak tumat om ciah kya ci. A ni cu a cun ah Roma ga k’kap yum ghong gui no kho ng’yo am a mi gänap nak ah poi ung a hteh tu vai ah a mi beit tu cu dam ciah kya ci. A ni cu ng’tuk ah nak ah k’khim lah a ng’shung nak gui cu m’dek khan ah k’cha ne ta a ni cu Christian yum tu k’chang tumat ah kya ci ci cu m’dang ne k’chang gui no a mi hmat vai ah m’lä m’khang ne a cun ah poi ung a hteh tu vai ah dam ciah kya ci. Kei cu a k’cum a ng’däih ah ghüng ne om ciah Khanpughi lam ah ga k’kap tumat ah ka kya ci ci ne pyein ci.
A cun ah pyein hleih Mercellus cu ngami no poi a mi bi yah ung pha ne ta a mi chum ah kya ci. A ni a mi ng’shi nak ung phih Khanpughi khäng htek hleih a yum nak awn a ni cu a k’cang ah Christian tumat ah kya ci ci cu ling ne pyein ciah kya ci. A cun ah ling hleih Roma a ng’vai k’chang Aurelian Agricolanus no a ni a mi ngon vai ah phupit ci. Cun tu pang ah phih taga nak ah yung ung om ciah ca gui guk ciah ng’shä Cassian ci ah ng’ming na ci no a mi ngon vai ah k’chü a mi cha cu kä taga ci ci ne a ma ah kya ci. A cun ah a pyein ah phäh ah Cassian cun phih a mi ngon vai ah a mi phukpit ah kya ci. Mercellus cu AD 298, October k’cha 30 ung a luk’ke m’chünpit ne a mi ngon ah kya ci. Mercellus ngon vai a mong kä taga ci ne pyein ciah Cassian cun phih a mi ngon ah kya ci.
