Bä ciah Simon lah Bä ciah Jude ah ghünlu a mòng
Bä ciah Simon lah bä ciah Jude cu Boi Yesu ah hluläk ng’shä goi ah kya ci goi. Bä ca Simon cu Galilee khaw Cana mânggo ung ng’tüi ca kya ci. A ni cu Judea k’chang gui ah läk lam gui a k’ni ah yum ne läk hleih Zealot ci a phih ng’ming na ciah kya ci. Ling kha peng ci gui ah Zelots gui cu Judea kho ung Rom k’chang gui a mi luh ein hlot vai ah a mi bi ah yum nak lam lah ghunkho lam a ng’htoi ah kya ci. Ngami gui cu k’phlam loh gui ma u ne Roma k’chang gui a mi ng’vok gen püi vai, a mi pung kan gui vai ah a mi bi ah ng’htoi ah kya ci.
Simon cun phih Boi Yesu no kä chü pha ung a cun ah ng’htoi ung om tu man ciah kya ci. Simon cu Htitheing ca Muh Khanpughi a kyum lo vai k’äih ne om ci gui ah Boi Jesu ah hluläk ng’shä gui awn a täng ah om tu ci ci cu Actus 1:13 ung om ciah kya ci. A cun teng ah a kya ung ngami gui cu Boi Yesu ah khan ah a kya ah yum ne yei na ne ät ci gui ci cu ng’dang ciah kya ci. Htitheing ciah Mu Khanpughi a kyum lo nak ah poi a om kon ah Bä ciah Simon cu Parsia ghun kho ung Khanpughi ah mong lam thähla m’thei m’thang ne ta a cun ah ghunkho mät ung shih ciah kya ci.
Bä ciah Jude ah ng’tüi nak cu a u no ni hleih kä k’shing ve ciah kya ci. A ni cu Galilee kho, Judea Mânggo ung ng’tüi ci ne a mi pyein ah kya ci. Persia, Asia Minor lah Egyipt khaw gui ung hteit neh Khanpughü ah mong thähla m’thei m’kan ca bä ca chang tu mat ah kya ci. A ng’ngaih u vai kä om ba ca k’chang gui ghung m’htei ci ah bä ca Jude cu 1st Century ung Judea khaw, Galilee ung ng’tüi ci. A ni cu Boi Yesu ah hluläk chang James a k’hmo awn ng’phäi ng’na goi ah kya ci. Boi Yesu no kä shop ha hleih kho m’dek no kä na hngu ba khai , nang mi no läi nami na hngu khai ci ne a pyein cu kä k’shing ne ta Bä ciah Yuda no Yohan 14:22-23 ung “ Boi aw, i kia hlei namät noh namät khawmdek am kä k’hmuh ne kei mi am na na k’hmuh gui hlü ci ang? ci ne Boi cu ng’shi hleih Yesu noh kei na m’hngi ci noh ka k’chü ng’ ngai khai. Na mi ng’yak ah k’chü cu kei ah k’chü ah kä kya ci. Na tüi lo ciah Pa Khanpughi ah k’chü ah kya ci” ci ne m’shang tu ba ci. Ka ning om püi gui yah ung shin na mòng cu ka ning m’thein gui ci.”.
A ni cu Juda m’thei m’thang m’cäi m’ä nak ah ng’thu ci ne Yumtu ng’bum am guk ca kya ci. A ni ni k’hngih cu Christu kum k’chukkipleik’hma (65) phelang ung cang lam ah phäh ah a hngun pe ki goi ah kya ci.
