Bä ciah Gaudentius ah ghínlu a mòng

Bä ciah Gaudentius cu Italy ghunkhaw Brescia Mânggo ung Taigü Mâng ah kya ciah Philastrius ah m’htei m’hta ah k’cahng ah kya ci. Taigü Mâng Philastrius no Gaudentius ah ca a ng’thei ng’thang nak ung hlü ciah ngui awn gunhtot ne Khanpughi ah mong lam bi koh nak ung a gok tu vai ah phih lam a pyan peit ah kya ci. Gaudentius cu Brescia Mânggo ung om ci gui ah k’chang gui no a kya ah m’nai tu u ne yei na tu lang pang u hleih phih Italy ghun kho nong ghüt ne Cappodocia, Asia Minor ung om ciah Caesarea ung hteit ne Yahteih ah kyat u ci. Brescia Mânggo ung om ci gui ah k’chang gui no Gaudentius cu kä k’hmih ne a kya ah yei nak u ne a mi m’nai ah kya ci. Taigü Mâng Philastrius shi hleih Gaudentius cu a om nak man ah Brescia ah a hteh ba vai ah a mi chü ba ah kya ci. Christu kum 387 ung Gaudentius cu Bä caih Ambrose ah kutu ng Taigü Mâng ah kya lo ciah kya ci.

Gaudentius hmat ne k’shíng ci gui no a ni cu a kya ah ami yei nak ah kya ci. A k’tung pi ah Boi Yesu a ghün lo nak ba ah poi ung phaya kyawng kä hteit tu hnging ci gui ah yumtu k’chang gui am ca guk ne a m’thei m’thang a m’khäh ah phäh ah k’chang gui no a ni cu kä mi k’hmih ah kya ci. Papa Shangpughang a k’htük nak Innocent lah ghunkho Shangpughang Honorius no John Chrisystom  gunhtot tu khai ah Constantinople ah a ni tüih ah kya ci. AD 405 ung a ni ah lam hteh hton cu yeikyai vai ah kä kya ciah buit awt ciah kya ci. Constantinople ung om ci gui no a ni cu kä do hlu ci gui ah kya ci. A ni no a pyein gui phih a u no kä ng’ngai hlü ci gui ah kya ci. Gaudentius lah a khah püi gui a van pha gui ne a mi chum gui ne ta ghatghum hleih a mi duk dei nak gui ah kya ci. A ni cu Constantinople ung khokum k’hma be lo hleih shih ciah kya ci.