Caspistrano Mânggo ung ka Bä caih John ah ghünlu a mòng
Franciascan ng’htoi ung a ng’ming thang ciah Khanpughi ah mòng lam thähla m’thei m’thang ciah Bä ciah John cu Christu kum 1386 ung Italy ghun khaw Caspistrano Mânggo ung ng’tüi ciah kya ci. A ni cu ni k’she taga khai ah läk lam gui ah kya ciah hnguh shim nak ung paraku Poih a gah kon ah Perugia kho uk khai ah a mi k’hmoh ah kya ci. A cun ah kho ung om ciah a kya ah kyom htang ne ng’büh ciah k’hngumi hta tumat awn ng’khah ci goi ah kya ci. Christu kum 1416 ung Perugia lah Malatesles ah ng’lak ung ng’tuk ah nak om lo hleih a ni cu pha ne a mi chum ah kya ci. A cun kon ah a k’chu awn ng’cha ng’tai lo ni ne Franciscan ng’htoi ung lut tu k’khai ah a m’lung phukpit ciah kya ci. Ng’pyi pi ciah a ni ah ghünlu a k’ni ah a pyantham ba vai ah Perugia kho ung a ni no a bi ah kat nak kä ni ci gui awi ne ng’hle hta tumat ng’cum ne hteit hton ghüi ciah kya ci. K’chang gui ah k’phan k’chang vai hlü ah (Friar Minor) ung lut tu k’khai ah ng’shang tu ciah kya ci. A cun yah ung a ni cu a khokum 30 be lo tu lang pang hleih phih Boi Yesu ah a shi lah a hla kä ei ok tu pha ciah kya ci.
A cun ah Minor kyawng uk ciah a ng’vai no a ni Khanpughi no a chü cu lang ne htitheing ci ci cu a hmat vai ah phäh ah k’chang gui kä täng ein ciah a vuuk hnguh khai ah a m’lung k’nga a a pyantham peit ah kya ci. Cun tu pang ah phih John cu a ni ah yum nak ung a khäng htek nak lah a m’lung a m’yo nem nak awn a cun gui cu a k’ni ah do ne läk ciah kya ci. Christu kum 1420 ung John cu Taigü Boi ah kya lo ne a cun ung ka no tün ne Italy, Jermany lah Hungry ghunkho gui ung a kya ah a bi loh gui awng tang lo ciah kya ci. Christu kum 1456 ung Papa Shangpughang no Turks pa k’khui k’chang gui awn yum nak lam ung a mi ng’tuk ah nak ah Crusade ng’tuk ah nak ung htei ne Khanpughi ah mòng lam a mi ng’thei m’thang vai ah tüi hleih a cun ung hteit ciah kya ci. Turks pa kkhui k’chang gui cu Belgrate Mânggo k’bui ne Europe pum a van tuk khai gui ah a mi pong lo yah ah kya ci. John cu k’chang shíng 70,000 hlok a mi shi nak vai hlü ung ka a k’pyhon ba gui ah kya ci. k’cha k’thum sho lo hleih a ni cu shi ciah kya ci.
Katmah k’chang ah ciah mi mi gui cun phih Bä ciah John ah hlo ah kat püi gui ah phäh ah a k’ni ah ng’yu ng’yon ba ne ghänlu pum a k’ni ah om ih hlü ah m’lung k’nga awm pyangtham ne yum nak ung a k’ni ah khäng htek lo pihti vai ah Bä ciah John ung ka no Khanpugi ah k’thagui mi shang ko.
