Khalkis Mânggo ung ka Bä ciah Malchus ah ghünlu a mòng
Bä ciah Malchus 4th century ung Syria Mânggo ung ng’tüi ciah kya ci. Bä ciah Jesrome no a guk nak ung Antioch Mânggo pei ah om ciah Khalkis Mânggo ung Syria k’pa k’khui k’chang ah kya ciah Malchus awn a ni ng’hnguh kon ah Malchus a mòng a guk ah kya ci. Malchus cu hlalai ma ah a hteh yah ung a om nak vai a k’tung ah kä om hleih hteit ghüt ne om ci gui ah Bedouin Pak’khui k’chang gui no a khotang a mi guh gui ah hnguh ah a lot lo ba ah mòng gui cu m’then tu gui ciah kya ci. Bedouin k’chang gui no Malchus cu Euphrates tu nu khe ne a mi khah püi ah kya ci. A cun ung a mi ei vai shui lei ne om ci gui ah me ni hto ni cu a m’htei ne a ghünlu k’däih ciah kya ci. shuh tum k’theih ni hto, me gui ah hluk tui awn a hngun m’ghün ne om ciah kya ci. Pha ne khah püi ci gui ah k’chang gui no ngami ung ka k’hngumi tu mat awn a mi m’khah goi hlü ah kya ci. A cun ah k’hngumi cu a cei om püi tu lang pang hleih phih ngami gui ah pyein läk ne om ciah kya ci.
Malchus cu Yahteih a kya lo yah ung a ng’kphyun te k’däih ne läk khai ah a m’lung a phukpit püi ah kya hleih a cun ah k’hngumi a om püi vai ah dam ciah kya ci. Cun tu pang ah phih a k’chu tumat vai hlü ah k’chang gui no a mi ng’ngaih vai düt ah om püi ne ta mü ah kä ih püi ciah kya ci. A k’hngu ah a cun ah k’hngumi cu Malchus no a be vai hlü ah a kya yei nak ciah kya ci. Kho kum 7 sho lo hleih ngani cu Bedouin k’chang gui ah kutu ng ka no pyhong ne a ni dong vai ah k’tha lo nak ci goi ah kya ci. A cun ah k’hngumi cu a cei awn a täng ah a ni om ba vai ah lah Malchus cu Yahteih kyawng ah hteit ba khai ah me ah vun non a mi pyan ah ik ung a ni ei ok vai gui m’khäp ni ne pong ci goi ah kya ci. A ni kho awn kho k’hngüp k’thum a ni hteh kon ah Bedouin khong mang k’chang lah a k’chang gui no a ni hngu ah ka no a ni kho pha ng’leh nak läk ne kalauk ng’chum ne läk ci gui ah kya ci. Ngami gui no a mi hnguh lo goi yah ung chinhtik no a cun ah k’chang gui läk ne ng’tuk püi gui helih ngani cu pyhong ci goi ah kya ci. Malchus cu Khalkis Mânggo ung om ciah Yahteih kyawn ah a gok ba vai ah htei ba ne a cun ung ka no bä ciah Jerome awn a ni ng’hnguh nak man ah Marona Mânggo ung ng’plon ne om ciah kya ci.
