Bä ca Luca ah ghinlu a mong
Oct 18
Sayavon gui lah Pagyi saya gui ghung m’htei ca bä ca Lukca cu Antioch Maanggo ung Sayavon tumat ah kya ci. A ni cu bä caih Polu no a kya ah a yei nak ah sei sayavon ah kya ci. A ghünlu a ng’thonghlah lo kon ah bä ca Polu awn Troas ung ng’hngu tu ni ne Greece ghunkhaw lah Roma maanggo ung Khanpughü ah a mong lam k’toi ne a ng’päng ah chüt hleih bi ci goi ah kya ci. Luca cu Khanpugi a kya ah yum äp ne hngip hngäi ciah a kya ah hlo ah a k’cum ah yei kyai ne om thei ciah k’chang ah phih kya ci. Bä ca Polu thongkhui kyawng ah a om yah ung Lukca bäng va kei awn a täng ah om ci ci ne (1Timothy 4:11) ung guk ca kya ci. Christu kum 64 ung bä ca Polu cang lam ah phäh ah a hngun a peit kon ah Luca cu Greece ghunkhaw ah om ne a k’thum nak k’thu thai lah Atus cu guk ci. Hnguh hmat k’chang ah a kya a hlo ah ng’thu k’ni a k’ni hta k’khäm ne, k’khei ci gui noh a k’ni ah mi hmat hnging vai gukthen ca kya ci. A ni cu Khantapup noh Nu Maria am ng’shä a tüih lah Nu Maria a paihta Elizabeth ah theit ne a om tu among a guk cu ng’shing ca ng’thuk’ni tumat ah kia k’ci. Ng’thu k’thai a k’thum nak ung a guk cu Khanpughü ah m’hngi nak lah k’chü m’gen nak a k’tung ah ng’dang khai ah guk ca kya ci.
Maih ca htome gui, nik ca Samaritan k’hngumi, khoh tang gui a kholä ah m’di m’dam ca hta k’pa tumat, kä ng’theih ca k’thei, a k’she lam ah a k’ming thang ca kat chang tumat am Boi Yesu noh k’pyhon nak a peit gui cu a k’ni hta ah ng’shing khai ah guthen ca Boi ah hlüläk k’chang tumat ah phih kya ci. Atus a guk nak ung cu a htük pi bäih ah yumtuk’bum ah ngoi ä hnguh shüm lä vai gui a mong cu guk ca kya ci. Pagyi saya kya ne bä ca Luke cu Nu Maria lah Boi Yesu ah sintuh mapibäih ne pyang ca chang tumat ah phih kya ci. A ni cu a khokum (84) ung shi hleih a ni ah üm na ne shüm vai gui ah ng’kho cu Constantinoble Boi Yesu ah hluläk gui ah ng’bum imu ng tha ne üm nak ki gui ah kya ci.
Bä ca Lukca ah hlo ah mi ghinlu pum Nu Maria yei na ne u pa ne, Khnpughü ah a mong thähla nak ung m’hteng ne ng’mü m’cha lam lah kiä lam ah a k’ni ah mi peit tak hnging vai ah mi k’tha na ko.
