Bä ciah Ingatius ah ghünlu a mòng
Bä caih Ingatius cu Antioch Mânggo ah Taigü Mâng ah kya ciah Bä ciah Yohan ah Phan k’chang ah kya ci. A ni cu Syria ung ng’tüi ciah kya ci. A ni cu Bä ciah Petru ah kut ung Taigü Mâng ah kya lo ne k’chang gui no a mi m’nai tu hnging vai ah k’hto k’shäm tumat ah kya ne khokum 44 khe ciah läk lam gui awn om ciah kya ci. Trajan Boi no k’chang gui a kya ah kalu na ne a ci yah ung a ni cu chinhtik am a mi m’ei vai ah Roma Mânggo ah a mi chum vai ah pha ne a mi khah püi ah kya ci. A ni ah ghünlu ng’däih a ni ah phäina gui Boiphaya gui ah yum nak gui khänghtek khai ah ci pe gui ne a ng’ming thang khai ah ca ng’lep chüih guk ciah kya ci.
Hluki k’chang vai gui thong khui k’kyong ah ka no a lot lo ba vai ah ci ci gui ah Romah Christian k’chang gui am “ Shin ah gatghum ci gui ah taliksan gui cu kei lah Khanpughi ah om nak ah ka hteh nak vai ah lam na m’cha pei ci gui ah kya hleih ngami ah ei vai ah kya hlä. Kei cu Khanpughi ah htang m’ghuh ah kya hleih shin ah ghat ghum ciah taliksan gui ah hnga awn a mi na htuih vai ah ka kya ci. A cun ung vah kei cu Boi Yesu ah htitheing ciah ei ok vai ah ka kya lo khai” ci ne guk ciah kya ci.
Christu kum 107 ung Roma Mânggo ah gok ne kya hleih a cun ung a kya ah tukhtat u ne a mi ngon vai ah Colisium ah a mi khah püi ah kya ci. Kho k’hngüp a k’sho ei kä m’ei ne a mi chum kon ah a kya ah kyühkyok vai ah kya ciah Chinhtik k’hngih no a ni k’doh ah kya ci. k’poih ba ciah a ni ah a guh a pi cu Roma Mânggo ung a kya ah üm na ne ngoiä shüm hlä vai ah a mi htin ah kya ci.
