Avila Mânggo ung ka Bä ciah Theresa ah ghünglu a mòng
Bä ciah Theresa cu Carmelite Mamah ng’htoi m’düih ciah bä ca k’chang tu mat ah kya ci. A ni cu Christu kum (1515), March k’cha (28) ung Spain Ghunkhaw, Avila mânggo ung a mi hta nak ah kya ci. A k’hmo yah ge ung tün ne a khaw ng’däih ah khäng thek ciah yum nak awn Khânpughü am a ghünlu gänap hlü ciah kya ki. A kho kum ghaleigoi, a nu a shih yah ung Nu Maria ah a gup ah hteit ne tuh bäih ung tün ne Nu Maria cu kei ah nu a kya hlä ci ne kyap ne k’taigü ciah kya ci. A khaw kum (20) ung Avilla Mânggo ung om ciah mamah ng’htoi ung lut tu ci. A luh nak tu ah mamah ng’htoi ung om ci gui cu Khânpughü lam ah a mi ghinlu a k’ni ah kä gänap ci gui ci ah a hnguh gui cu ani ah phäh ah cäicat nak vai kya ci. Nga mi ah hteit ne om tu ciah k’chang gui awn yeikiai ng’hta ng’ko ne a mi k’taigü vai lah Khânpughi a mi ng’hta ng’ko shüm hmat vai kä tä ne om ci gui.
A daapi cun phih k’tha ne a i kä bi hlü u ne ei düt ci gui ah kya ci. Cun tu pang ngaphih bä ca Theresa cu Khanpughü ah chü thäm nak hmat ne a cun nung m’hteng ne a k’ni ah gänap ne om ghning ciah kya ci. Yumtuk’bum ah a ng’vai gui noh kä yum tu bang lang hlei phih Christu kum phya ghaleik’hma lah k’chukipleiät (1561) ung Avila Manggo ung Marmah ng’htoi m’düih ciah kya ci. A cun ah marmah ng’htoi ung om tu ki gui cu m’hteng ciah läklam vai gui a k’ni ah läk ne a cum ah dimkyäp ca ghinlu awn gänap ci gui ah kya ci. Nga mi gui ah ng’phep guih ne du nak lah kiünhloi ne a mi om cu ng’hmat khai ah a mi khawdok gui cu gui awn a mi pyan düt ng’leh ne om ci gui ah kya ci. Bä ca Theresa cu ng’mü m’cha lam ung thuuk ca k’cä gui yum ciah kya hleih a caguk a k’daa pi ung hngip hngäi ca m’thei m’thang gui guk ciah kya ci.
Bä ca Theresa cu Christu kum phya ghaleik’hma lah chüütkipleigoi (1582), October (4) ung shi ciah kya ci. A ni cu a mi lu k’ke m’hneh ki gui, kä gai ki gui ngüng m’htei ciah bä ciah k’chang tumat ah kya ci.
