Bä ciah Edward ah ghünlu a mòng
Bä ciah Edward cu England ghunkhaw ung htitheing ne bä ci ah k’chang tumat ah a ng’ming a thang cu a ni ah k’kaa ah om ci gui ah k’khan ah a í kä m’yih m’thu ein ne bi a bi nak, pyam ci gui a k’khan ah ng’khai ne a gunghtot gui nak, a m’lung a ng’shunghei nak lah a hngiphngäi nak, shihla lam ung a mät no a mät phep ne a k’ni ah a om nak gui awn a ng’ming thang ciah kya ci. A ni ah k’chang gui no a mi m’nai tu vai a mong gui cu a ni ah a m’lung k’nga a om k’ih gui no a k’ni ah m’dang ciah kya ci. Edward cu a khoh tang k’thum vei peng peng m’guuk pe ciah a phan ah k’chang a m’guuk yah ung a mät no bui tu lang pang ne phih a m’guuk ah khoh lak hlak ne a tüih ba hti ah kya ci. A í ah kya hleih ci ung pyam ciah k’chang gui no kei a ta khotang gui hlü tub a khai ci ne a ng’ngaih ah phäh ah kya ci. Nandaw m’kot pei ah om ci gui ah kyam no a ei gui ah k’chang gui cu a kut awn do gui ne a mi k’tha om, a mi m’lung gei khai ah ng’hta ng’ko püi gui ne ci ci. A ni cu bung hngu ah hteit ne hla shui ah ghäng ciah kya ci.
Christu kum 1042, a kho kum 40 a be lo yah ung a ni cu Thinan khai ciah kya ci. A ni kä khai pha ung Scandinavians pakk’khui k’chang gui no England kho a mi lak ah kho kum 20 peng peng ung Norman kho ah a mi gottäm gui ah kya ci. A ni ghunkho kä ni yah ung Shangpughang ah Tínan do ne a uk ah kya hleih Hnguh hmat k’chang gui ah kya ciah htuh htei hti gui no a ni ah shangpughang ah kya ne Tínan a do ah mong cu leng ne ng’shi k’ca ba ci gui ah kya ci. Cun tu pang ah phih a ni no a uk ah kho kum 24 ung ghunkho dìmgei hleih om ci gui ah kya ci. Shangpughang Edward no a uk nak ah k’kaa ah om ciah Englan ghunkho cu ng’büh ng’mang lo ne ghunkho k’chang gui cun phih a mi m’lung dím gei hleih ghüng pyhong ne om ci gui ah kya ci. Ghuunkho ung om ci ah Phayakyawng gui phih a k’ni ah pyangtham ba ne a ci ah kya ci. Shangpughang Edward cu Westminster Abbey Yahteih kyawng a mi coh nak ung a k’tung pi ah gunhtot tu ciah kya ci.
A gah ah ngui gui ung ka k’pai ne a cun ah Yahteih kyawng a mi coh nak vai ah gänap pe ta gui ne kho m’dek cun phih a peit gui ah kya ci. A kya ah däm ne kyom tang ciah Phaya kyawng nu cun phih a coh ah kya ci. Christu kum 1066 ung a ni cu shi hleih a ni no a coh nak ah Phaya kyawng ah pei ah a mi k’phuh ah kya ci. A shih kon ah khokum 40 be lo hleih a mi k’phuh nak ung ka no co ba ne a mi teng te Edward ah kyä cu kä thuk ciah a mi hnguh ah kya ci. A cun ah akyä kä thuk ci cu la ba ne ghunkho Mang gui mah ah Christu kum 1163, October 13 ung htüm ba ne ta a mi k’phuh ba mä ah kya ci.
