Shangpughang David
Egypt Kho-ah kah phyong lo ca Isarael k’chang gui cuh kho kum sho lo hleih ahngei kho gui ka hlo-ah Shangpughang tumat ng’ya lo tu hlü ci gui. Khanpughü noh Shangpughang tumat cuh k’chi tui-awn hlup neh m’düih vai-ah prophet Samuel cuh phan ci. Samuel noh Solu cuh k’chi tui-awn hlup neh Shangpughang-ah k’hmawh ci. Cunte Solu cuh Khnagpughü-ah k’chü kä ng’ngai neh Khanpughü aäp nak-ah k’tha cun phih kyen lo ci. Caw kia hleih David ng’ming nak ca Shangpughang cuh Solu ashih kon-ah apa khui k’chang khong mang gui khai-ah ghü ci.
David cuh hto gui shäm ca ak’hmo hta-ah kia ci. Cunte ani cuh Isarael pa khui k’chang gui-ah phäh cäi cat vai-ah k’thai gui m’yung m’ya mah neh kia lo ci. Ani cuh gai ghang neh ng’tuk ng’aah nak gui-ung phih ak’ni pi lam gui cuh shui thei ca kia ci. Ani cuh Jerusalem tu neh m’chüt neh ak’chang gui-ah mang go-ah kia hlak ci. David cuh Khanpughü yum neh m’hngi neh ak’chang gui-am phih ni ca ghün om nak vai gui cuh m’thei m’thang gui ca kia ci. David Shanpughang cuh mikmi-ah ghün om nak-ung Khangpughü ak’cum-ah om ca akia-ah mong lah Khanpughü noh i hlok-ah ana m’hngi gui-ah mong cuh na m’thei gui ca kia ci. Ne tah Khanpughü i hlo cha m’hngi tu ba vai mong gui cun phih na m’thei ba gui ci. Khanpughü noh gai ghang neh nget ngong hnging ca Goliat am’chüt hnging vai-ah gung tu ci. Goliat cuh dong k’chuk lo neh ang’thuh-ah hlui hlak gui, ak’koh-ah k’chim cun phih däm neh güh ca kia ci. David cuh yaw tawi neh k’chim phih kä k’kot tu ca kia ci. Cunte gai ghang ca goliat cuh ang’tuk püi vai-ah Khanpughü cuh ääp ca kia ci. A ning tuk nak-ung ng’näng ci. David noh ak’chang gui-am am’dang hlü cuh ng’müng van di maih lo khai ci-ah ng’ngaih yah-ung Khanpughü cuh mikmi-ah pei-ah om ci ci-ah kia ci. Khanpughü-ah k’tha gui huu ham cuh kho m’dek khan-ah om ca ng’mü van gui-ah tah däm da tuba ca akia-ah mong cuh am’dang hlü-ah kia ci.
David Shangpughang noh shuh shan nak-ah ahlü-ah mong cuh na m’thei gui ci. Ani noh ng’awi neh ng’ngaih phya ca tum k’khawn nak gui lah ng’äi ng’om nak gui cuh gu neh m’cu ca kia ci. Khanpughü-am ani noh ang’äi gui cuh salan ng’äi ci neh ang’ming thang ci. Cun-ah ng’äi gui cuh m’hngi nak lah m’tam khah nak ng’äi-ah kia neh kum phya k’da sho lo tu lang hleih Khanpughü-ah im k’kyong-ah tu ngawi güt chüt hleih m’cu ba-ah kia ci. I kia hleih ci-ung nga mi noh tuh chü mikmi noh mi yu-ah Khanpughü cuh bä neh hlüng tai neh kia ci ci-ah täng ca yum nak cuh na hmat tu hlak gui ci-ah kia ci. Ani-ah m’hngi nak yei nak cuh ak’cum-ah ng’däih hleih om ci. Mikmi noh ani cuh shum chuk neh m’tam khah neh mi kat nak gui cun phih ng’yu ng’yawn ba neh mi om vai hlü ci. Ani noh atüi pyan gui cuh mi m’hngi neh mi htei vai hlü ci. A ghün hngun ana k’pai tu gui-ah phäh phih mi shüm hmat tu ba vai hlü ci.
David Shangpughang cuh ni ca Shangpughang-ah kia neh Khanpughü cuh k’phyon ca Bawi ng’däih ca shangpughang cuh ani-ah kyong khui-ung ka noh om lo khai akya mong cuh k’chü khän te ca kia ci. Bawi Yeisu-ah hlo-ah David cuh a hto ng’nong cuh m’htei ca k’chang, ni ca hto k’shäm-ah kia ci. Ani cuh hnguh hmat nak gui-awn be neh taga ca Shangpughang-ah kia ci. Goliat-ah kut-ung ka noh Khanpughü noh ak’phyon yah ge-ung Khanpughü-am a hngun pe khai-ah ng’ngai ge ca kia ci. Ca gui guk neh m’cu ca Shangpughang cuh k’chang gui k’phyon vai Khanpughü-ah bü ceng nak-ung k’chang k’bä tumat-ah kia tu ci.
