Bawi noh Kho-nget k’täm ci.

Cun zah-ung, áng ci-ah khaw k’sé tumat cuh k’täm hleih khaw k’sé lut lo chü-tah áng ci-ah k’chàng cuh k’chü lo ci. k’Chàng a k’dá nawh hnguh tu neh a ng’htéi-ah cäi ci gùi.  “Sin-ah k’chàng cuh khaw-‘nget gùi-ah báwi, Beelzebul-ah ng’ming- awn, khaw-’nget k’täm m’chüt ci,” ci neh a m’sah nawh piéin ci gui.  A m’sah gùi nawh phih, Jesu-ah k’chü sàng u neh Khãnmòpí ung-kah, cäinák vai tumat a k’hmuh gùi vai-ah sàng ci gùi.  Jesu nawh ngami-ah m’lùng ng’ngaih hmat zop neh a m’sàng tu bà gùi cuh, “A i ghun-khàw phih, a mät-awn kä ng’gèi neh ng’pài ci-ah a kia-ung, dí sùm lo man ci. Im gùi phih, tumat-ah ’khãn-ah tumat kiu lo man ci. Cun-ah kia hleih khaw-’nget cun phih, a mät-awn kä ng’gèi neh a ng’pài ung a i-ho k’chà-ah ani-ah khàw cuh, khäng hnging khai ang?  Kei nawh Beelzebul zun tu neh khaw-’nget ka k’täm vai hlü-ung, nami htá gùi mä, a u zun neh khaw-’nget k’täm hnging ci gùi-ang? Asin-ah nami ci-a phäh-ah, nami htá gùi cun nawh ning m’cha m’lang gùi khai-ah kia ci.  Kei nawh Khãnpùghí-ah m’zung-awn, khaw-’nget ka k’täm ci-ah kia hleih Nangmi gùi-ung, Khãnpùghí-ah ghin-khàw cuh gok lo pi ci-ah kia ci. A k’tha-gui dá ci-ah k’chàng nawh lí-’chìm phih säm neh a im a m’htéi-ung, a khawh gùi-a phäh-ah, i kiüh vai kä om ci. A cun-ung phih, gái tu bà ci-ah k’chàng tumat lo neh ani cuh, ng’tuk püi neh a m’chüt-ung, ani nawh a äp te-ah lí-’chìm gut zop nehtah a khawh gùi cuh, phiak neh phiüt-k’pai zop khai. A u phih kei-awn a kong ät-ah kä k’bum, kä m’cun tu-ung, püí-piáng düit  khai.