K’chang K’bä Tumat-ah M’taih Nak Lam
1983 kum-ung PaPa Shangpughang John Paul (2) k’chang k’bä noh k’chang k’bä gui m’taih nak sanit cuh pyang tham m’thong m’hlai ghüt ci.
Cun gui cuh
Ma neh theing thap thing ling neh ghüng om te ca k’tai gü bawi, Mamah kä cun-ung yumtu k’chang ng’neng cuh a shih kon-ah shin-ah k’chang lei aom ih ni man ci, k’chang k’bä tumat-ah kia tu chin ci ci neh ami yum neh ami pyein lo-ung k’taigü bawi ni lah yumtu ng’chang gui noh k’taigü mang-am ca guk neh taih ci gui. K’taigü mang noh yumäp nak-ung hnguh hmat ca k’chang bawh kyai kä cun-ung hngu mong gui hnguh hmat ca k’taigü bawi (or) yumtu k’chang tumat kuku-am ma momg pe neh k’chang k’bä-ah m’taih vai-ah k’chang-ah hngu mong gui cuh shui lei neh teng gui hlak ci. Cun gui cuh cang neh ang’hten lo-ung k’taiü mang-am m’thein ba ci gui.
Vang täng-ah ani-ah hng mong gui m’cut-ah hlo-ah vang täng -ah cäi cat vai-ah mik hnguh nak gui aom lah kä om gui, aom-ung phih cun-ah k’chang k’bä-ah m’taih vai-ah k’chang-ah bi akya lah kä cun cuh güng neh teng ba cang ci gui. K’cheng neh cang ca mong ang’dang lo-ung k’taigü mang-am m’thein neh ca m’taih ba-ah kia ci.
Cun kon-ah k’taigü mang noh (or) k’taigü mang noh abi hlak-ah k’chang noh ami m’cut lo-ah mong gui lah cäi cat vai-ah mong gui cuh ak’püh ak’cheh-ah shui lei ba mä ci. Cun gui akyüm be lo-ung k’taigü mang noh a hngei k’taigü mang gui, ng’thei ng’tham hnguh hmat ca k’chang gui ni, yumtu ng’bum gui-awn ng’ge ba netah Rome mango k’chang k’ni k’chang k’bä gui m’taih nak bawi phung-ung agok-ah m’chäh ci-h kia ci. Cun -ah chüt-ah ang’päng lo-ung k’chang k’ni k’chang k’bä-ah m’taih vai-ah k’chang shing-am “Servant of God ” ci-ah Khanpughü-ah phan-ah k’chang ci neh m’hlüng m’tai ci gui.
A hngih nak m’taih nak ba vai phäh-ah “ Blessed ” ci-ah Khanpughü-ah ni bä nak gah ca k’chang ci neh m’taih ba vai phäh k’chang k’bä ci neh m’taih vai-ah chang noh ashih kon-ah cäi cat vai-ah huham (or) mik hnguh nak tumat ku am’dang vai hlü ci. Vai hlü-ung kah k’chang k’bä-ah m’taih vai-ah k’chang cuh ayum nak-ah phäh-ah ami ngon, a hngun pe ca k’chang-ah kä kya neh dim-ung shik ca k’chang-ah akia-ung Khanmopi-aah ka noh am’dang cäi cat vai am’dang-ah mong cuh ang’hten vai phäh-ah cäi cat nak tumat am’dang vai hlü ci. Cun cuh ng’dang dang khai-ah ni m’thein tu gui-ung, Kalakata mango-ung-ah k’chang k’bä mather Theresa cuh Blessed ci-ah khanpughü-ah ni bä nak gah ca k’chang-ah ami m’taih yah-ung am’dang ba-ah cäi cat nak lei cuh Christian-ah kä kia ca ahngei India k’hnguhmi-ung m’dang ci. Ani cuh cancer go nak cuh apoi-ung om hleih m’neh tu lä ci. Shei Bawi gui phih aghün ba vai lam kä om hleih ami nong-ah kia ci. A hngu-ah a u pa vai kä hmat lo neh Mother Theresa-ah müi gup-awn apoi cuh tawk neh “Na gok nak-ah ka noh ka gai ba vai na ng’hui tu peit-ä” ci neh shuh shang laih laih hleih am’neh-ah cancer go pai nak cuh ang’yung-ah ng’mawi neh maih hleih shei bawi gui noh phih cäi neh van-am m’thein tu nak bi ci gui. Shin-ah hlo-ah cäi cat nak tumat ku am’dang vai hlü ci. Shin-ah hlo-ah mong gui-awn akyüm be-ung PaPa Shang pughang noh Blessed ci-ah kho m’dek pum-ung ng’thu shä ci.
A k’thum nak-ah kia ca “Saint” ci-ah hngün-ung gok lo vai lei cuh dim-ung shih ci ni, ayum nak-ung ahngun pe cini, ami ngon-ah k’chang gui cun phih cäi cat nak tumat kuku ami m’dang ba vai hlü lo ci. Cun-ah ami m’dang ba hnging-ung “Saint” ci-ah k’chang k’bä,k’chang k’ni ci neh m’taih ci gui-ah kia ci. Cun -ah ami m’taih kon-ah kho m’dek pum-ung ani cuh ng’hui ng’pa na neh, ng’ngaih u neh, shuh shan nak neh gah püi-ah kia ci.
K’chang k’ni k’chang k’bä gui ci neh m’hlüng m’tai gui cuh kho m’dek khan ami om yah-ung thing ling chüi kha neh ng’shung hngei hleih om te ci gui ci-ah m’dang nak-ah kia ci.Yumtu na’bum noh am’taih lo-ah phäh-ah k’chang k’ni k’chang k’bä gui-ah kia lo ci gui-ah kä kia ci.
Khanmopi ghui im-ah gok tu ci gui phung cuh Saint gui-ah kia ci.
Catholic yumtu ng’bum noh ni tu hnga neh üp äi thing ling nak-awn ghüng om te ca k’chang gui cuh yumtu k’chang gui noh thei tu u neh yum nak ak’be-awn Khanpughü-ah m’cäi ami läk tu hnging vai ni, kho k’chang gui täng täng ami m’hngi lo pi hti hnging vai phäh äp nak om ca kia-ah mong cuh am’thei-ah kia ci.
