Bä ciah Bruno ah ghünlu a mong

Bä ciah Bruno cu Christu kum 1030 ungJermany ghunkho,  Colone Mânggo ung ng’tüi ciah kya ci. Taigü Boi ah a kya lo kon ah a ni cu Reims Mânggo ah Cathedral ung yumtu ng’bum ah ng’dang ne a ming thang ci gui ah Pyinnga hnguh hmat k’chang gui daa lo k’khai ah bi bi ne kho kum 18 peng peng a k’ghuih ah m’thei m’thang ciah kya ci. Christu kum 1074 ung kho m’dek kä cang ciah a bü ceng nak gui a plän hnging vai ah ci ne Yahteih ng’htoi un glut tu ciah kya ci. A cun ung a hteih püi a m’sha awn k’taigü ne kat nak gui ung ka no pyhon nak a om vai ah phäh ah bi loh nak lah läk lam gui awn khong mang ne om ciah kya ci.

Khokum gha a sho lo kon ah a ni cu Carthusian  ng’htoi a leng nak k’chang gui a kya ah ken ne kho m’htung gui be ciah bung hnguh ung om ciah Chartreause  ung ng’plon ciah kya ci. Ngami gui a täng ah a mi k’taigü nak vai Phaya khan lah a mi mät phä phä a mi om nak vai ah a khan hta gui cun phih co ne ci ci. A cun ah a mi om nak ung k’hngumi gui kä mi hteh ein vai a mi ci ah kya ci. Ng’bum ne ca a mi teng nak vai Missa a mi gänap nak vai ah ngui calix bät hta bang tha u ne a kya ah duyai ci gui ah kya ci. Ngami gui no a k’tung pi ah a mi bi lo cu ca uk gui a mi ku ah kya ci. A cun ah a mi bi cu Uyopah ung a kya ah a ng’ming thang lo ciah kya ci. A ni cu a k’cum ah hti ne yeikyai ciah m’lung om ciah kya hleih a ni hngu ci gui a u phih m’lung ah gei nak gah ci gui ah kya ci. A ni cu Kala Mânggo ung om ciah Yahteih kyawng ung shih ciah kya ci.