Lisieux Manggio ung ka Yesu Nà yüt Boi bä ca Theresa a mòng
Bä ca Theresa cu Christu kum (1873), January k’cha (2) ung Pyinhtit khaw Alancon mânggo ung ng’tüi om tu ca kya ci. A ni cu Martin ah k’kiawngkhui ung a k’shui hta pi a kya ci. A mi hta nak ge ung keng ee neh kä gai hleih ghüng neh om tu khai ah kä mi ng’ngaih man te. A hmo hta zah gei ung tün neh kä ei ok hnging hleih a k’tha maih lo lei lei neh yai man ca kia ci. Theresa a nu cu a k’hmo hta yah gei ung Nu Maria a kya ah ng’ngaih u neh om man ci. A nu a hlo ah Theresa cun phih chang hei gui awn kä täng ein hleih Nu Maria gn’ngaih u neh Khanpughü yum äp ne om ci ah kya hleih a kya a goi zah ung Numaria noh gaih pui hleih hnguh ne a cun ka no a ten ah gai ba man ca kya ci.
A ni Khanpughü noh a chü thäm nak cu Christukum 1886 Nátalu poi do nak ah mü ung Nazüt Boi ah hngiphngäi ne thuk ciah a ng’dang nak ung ka noh tün lo ca kya ci. Christu kum (1888) a khokum 15 ung ( Papal dispensation) ci ah Papa Shangpughang ah Marmah kiawng a luh tu vai a k’bäi nak awn Lisieux om ca carmalite ng’htoi ung lut tu ciah kya ci. Christu kum 1890 ung a ghünlu a ng’däih a shi güt ah chüt hleih Khanpughi am pe khai ah ng’gun ne gänap ciah kya ci. A cun ung ka no leng a cop a m’ne nak TB yoka cu gah lo püi ciah kya ci. A ni ah m’neh nak cu ka lo lei lei ci ci cu a Mamah gui no hmat lo u ne a ng’vai no a ni ah yum nak a mong gui cu guk hlak hleih yai tu lang ne phih a ng’vai ah k’chü a ng’ngaih nak awn k’tha na ne ca uk k’chuk ah guk ghüt ciah kya ci.
Bä ca Theresa ah a k’cum ah a zumläk lä vai ah k’chü m’kha cu “ Ka m’hngi nak awn vah Khanpughi am ka peita ba hnging ki” ci ah kya ci. Marmah kyawng a om tu zah ung Theresa a läk lam gui cu a lang hta gui düt a vah kya ci. A hngüp täih hleih a bi hta gui ah kya k’ca phaipheih a pheih nak hta gui düt lah a hteihpüi pok’chang gui ah k’khan ah m’hngi yei na gui ne a hmat thei nak gui ung chang hei gui awn kä täng ein ca m’hngi nak awn a i phih bi ne a bi phung Khanpughü am gänap ca kya ci. A khaw ng’däih ah a kyä kä gai ne kya tu lang bang hlei phih Khanpughü ah ng’ thuk’ni a m’lung kyawng ah kyep cheng geng neh a zaica büiawt nak gui awn Khanpughü a zum nak khäng htek lo pihti khai ah k’tha na ne günap ca kya ci.
Marmah ah kia lo tu k’khai gui khong mang gui ne a pyhüi chan gui vai yah a ng’vai tumat ah kya lo ne a nà k’hhmo gui cu m’lung m’zonem nak lah htitheing nak awn a mi om hnging vai ah a m’gong awn m’thei m’thang gui neh,a omk’ih awn phih a k’ni hta a m’dang gui ne a k’ni ah khong mang gui ne do chang gui ca kya ci. A ni noh a guk ghüt ah “ Ng’mü m’cha tumat ah läk lam vai gui ah kya ciah ( The Story of a soul) “ kei cu Khanpughü ah ma ah i ah kä mong ne ka bi loh kä í äih hta gui dät awn ka gänap tu hnging ca i ah kä mong ciah m’mü m’cha hta ka kia k’ki” ci ne guk ca kya ci. A ni cu a kya ah goipyam tu lang pang ne phih Khanpughü lam ung a hngun pei hlük’aih ki kya hleih a k’taigü nak awn ng’müm’cha gui k’phyon neh khanpughü ah ghunkhaw a ng’shong vai ci ne gänap ca kya ci. A ni ah gänap nak cu Khanpughü ah ng’shung hngei nak vai kä kia ne Khanpughi ah a m’hngi nak ka phäh ah ka gänap ah kya ci ne pyein ci.
Theresa kä shih pha ung a pyien ghüt cu “ka ghünlu pum ung a däih ah Khanpughü yumäp ne m’hngi nak ung ka om ci. Thitheing nak ci cu “mät a m’lung kiawng ung ka noh m’lung m’yom’nem ne mät noh mät ah k’tha nem nak hmat ne k’chü m’gen nak awn be ca Khanpughü yumäp ung htitheing nak gah vai” ci ci. Theresa cu Christu kum Pyaghaleik’chüit lah k’kokipleichüih (1897) September k’cha thumkip (30), a khawkum m’kuleipli (24), ung Khanpughü ah bi abi nak marmah a kia nak khawkum k’ko (9) a be lo yah ung Pyinhtit khaw ah shi k’ki. A cun kon ah Christu kum Pyaghalei k’ko lah m’kuleihma (1925)ung a ghaleiät nak Papa Shangpughang Pius a uk za hung Khanpughü ah mòng lam bi ki gui m’htei gui ca bä ca chang tu mat ah kia lo k’ki. A nu lah a pa cun phih yumtu ng’bum ung letthat ne maapi k’bäih ne ng’chu ng’la goi bä ciah k’chang ah kya lo ci goi ah kya ci.
Mi k’mi gui phi bä ca Theresa ah hlo ah mi m’lung m’zo m’nem ne mi bi hnging awn Khanpughü mi gänap tu hnging vai ah mi k’tha na ko.
