Thùng yò lah akhòtüî
Thùng yó lah akhòtüî mhtêi nak vai a ktùng ah ngyung nak cuh kyòng pyinya mòòng ah kya ci.Kchô Kchî Kchò Thùng maih lo hlü ca shin ah khing ung mhtéi neh mkhännak vai cuh kyòng ca ngthêi nak ah vah kya ci. A i ah kya hleih ci ung pahta lam ah phih thùng yò ami mhytéi vai kä nghlôi ba ci.Kä tum kkhôn. kä ng’äî ng’om vai ah ami nong nak dhô lo chütah thùng yò cuh pahta noh khmaih ci ciah ami hnguh pyi ah kya ci.Thùng yò lah akhò tüî ngói güt mhtéi vai phäh ah kyòng ung akhmó gui ung ngyung ung vah khäng htek hlot khai kya ci. A i ah kya hleih ci ung kyòng ah kpùng ah kchò thùng hmat ci gui cuh ghí lo yop pyi ci gui.Acun ah aghí gui ah hnguh hmat pyéin hlak gui cuh mcùnmdòn guthên neh kyòng ung mthêimthàng ca saya sayamah gui am kshòn neh péit gui ung ngami noh akhmó gui am mthêi ba u hleih akhmó gui noh ngói chüt mshòn ba khai gui ah kya ci.
Acun ah kya hleih kchò mòòng mthêi nak gui cuh ngthêi nak ca ngbú gui ung guthén neh mthêi vai hlü lo ci. Ca ngthêi ngmìng na düt khai ah guk hlühlŭ gu neh kä mthêi en neh tün kyòng ngthêinak gui gé ung akhmó gui gui cuh Mváca ngthêinak ung ka nog kphlàn ghet ah kä kya en neh mät ah thùng yò on nggûi khai mthêi vai hlü ci.A vaihlü ahBook One Kchò Ca ngthêinak ung”A a htá ngshon mtäm baB b gha ngpha nak maC ca ngthêi guk thén neiD dâi cä phùi tu väE ng’éi phan ngbah èi manF Falam yo pa ng’nmciah ngthêi ca guk cuhMvá ngthû ah ngthêi nak ung ka noh k’ó mhlôi neh ami mthêi tu ah kya ci.Acun ah kya chütah kyòng ung Kchò ca mthêi vai tün pong lo nak 2013 kum ung lèng neh kchò thùng yò on ngthêi vai ng’äi ng’om gui ka guk ah kya ci.Acun ah ka guk cuh Kchò gui ah khtìng kbèi k’ó on ka guk ah kya ci.Book Two lèng nak ungCh ‘a ‘kcha noh kcha lum dan ci.
Gh ‘e’ nggh ung thrhta om ci.Hl ‘i’ khli no kht nän ci gui.Hm ‘o’ khmó noh pugho kkhek ci. Hn ‘ä’ hnän neh pyantham lä vai.Hng ‘ü’ k’khngü ung kcho shói äh ci.Ht ‘u’ khtu kkyom m’gu no ng’thuh ci.Kh ‘ai’ kkhai khmo tui neh hmüih ci.Ky ‘ei’ kyei yei nak vai kya ci.Ng ‘ai’ ngai noh k’hngai k’phyim na ci.Ph ‘oi’ phoi hta voi neh ng’lah vai.Pl ‘ui’ k’plui ci k’htu k’kyom m’thuh vai.Phl ‘äi’ phläi hleih m’tang neh m’khän vai.Py ‘üi’ pyüi ca k’kha k’hli kyom ci. Phy ‘üi’ phyüi neh m’dèi neh teng vai.Sh ‘ai’ shainak. k’ceh htung pyan vai.Th ‘ä’ thä nak k’pleikho pyan vai.”Shin ah gukthen ung phih k’ó gui kä om cuh mi hnguh hnging ci.A i ah kya hleih ci ung Kchò ca ngthêi tängpang ci gui ung k’ó on guk vai kä yum ci dá tu ba ca ka ci.Ngthêingthàm gui cuh tum k’khôn ng’äî ng’om hlû phih kyai,Kchò k’ó ah kyum kâi ah ciah phih mi guk thén ngthêingthàm vai hlü ci.
Cun kòn Kchò khmó gui cuh kyòng ung ami khmó yah ung lèng neh akhòtüî pèingléng ami mhngî thêi vai mthêi gui vai hlü ci.Avaihlü ahKchèipâi ami yèinak thêi vai ah”Kchèipai yèinak vaiKchèi a maih ung yèi chêi khai.Yèi kä mchêi vaiYèi têi vai”Cun kòn ah shingghing gui kä chuk vai lah bunghngu mêi on kä mkhih vai mthêinak mthêi nak ung.”Ghêi mêi van mhtéi vai.Ghêi kä mhtêi ung khò hêi khai.Khò kä hêi khaikho mhtei vai.”Kchòhlèi mhtéi vai. Avan kä khmaih en neh Kchò thùng ah lèi lah bêi ngtuk lah ngkòi ung phih mangca vai kä om lo ung lèi lah bêi kä pyi päng hlot vai a kya ah mòòng hmat nak vai ah”Hlèi nei na m’htei vaiHlèi kä m’htei ung lèi bêi khai.Kä lèi bêi khai hlèi m’htèi m’htei vai.
”Cun kon ah Kchòkhò ah cìn lo ca kong ni,kkhòm ni,nghêi ni cuh a cìn ung phih i ah kä kya khai.Nghêi púi läi cuh vuh mhtah na loh pe ciMcìn neh ngón vai ciah ah ngäh-tüh gui cuh ngngaih na neh pyantham ba vai ah ka guk cuh”Kong,nghei kä gêi hlü vai.A hlühlü gêi khai na mgei khai.A hlü lo khngüp kä gei khai”Acun gui mi mhtêimhtà ah akya ung acun gui noh na mhttéi ba gui khai ciah amòòng cuh Kchò thùng tum kkhông ng’äî ng’om ah k’ó on akhmó gui yèikyài neh ami mlùng khngà ung gok khai mi mthêi ah akya ung acun gui noh thùng yò lah khòtüí akní ah mhtéi hlü ca mlùng om lo khai kya ci.
