Bä ciah Jerome ah ghünlu a mòng
Ng’thu k’ni k’phan ne guk ciah Saya tumat ah kya ciah Bä ciah Jerome cu Dalmatia Mânggo ung Christu kum 340 ung ng’tüi ciah kya ci. A khokum ghalei k’chüüt ung Roma Mânggo ung m’shi nak Sacramentu ci tu ne hnguh hmat k’chang gui ah k’ká ah ca ng’thei tu ciah kya ci. A k’tung pi ah m’thei m’thang nak ung Saya tumat ah kya ciah Cicero cu a kya a m’nai tu man ah kya ci. Christu kum 374, kho k’hngüp ä tung Jerome cu a kya ah goi ne ta a mät no a mät Boi Yesu ah maa ah ni k’she m’cha ng’lang nak ah mang kyak ung gok ciah hnguh ci. A ni a u ah kya ci ci cu ng’shi hleih Jesrome no a ni cu Christian k’chang tumat ah kya ci ci ne m’shang ba hleih Khanpughi no nang cu nah le ciah k’chang ah kya ci. Nang cu Cicero ah hngu läk k’chang tumat ah na kya ci. A í ah kya hleih ci ung nang ah m’lung cu nang no na khin ne m’nai vai ah kya ciah k’chang ung vah om ci ci ne pyein ci. A cun ung ka no leng ne a ni ah ghünlu a van cu Khanpughi ah bi bi k’khai ah gänap ciah kya ci. Syrian k’pyha ng’tang ung kho kum a shäng Yahteih ghünlu awn läk lam gui awn k’tha na ne a om kon ah Jerome cu Taigü Boi ah kya lo ne Roma Mânggo ung Papa Shangpughang Damasus ah k’kaa ah Sacretary ah kya ne bi a bi vai ah a mi chü ah kya ci.
A ni ah ghatghum ciah a m’lung a k’cheh vai lah shih la lam ah toktap nak gui dìmgei khai ah a m’chüt näng hnging vai ah k’thu k’ni k’phan nak lah Hebrew ng’thu ng’thei nak gui ung a m’lung k’phùm ne bi ciah kya ci. Christu kum 385 ung Bethlehem Mânggo ung om ciah ku hta ung ng’düm ne ng’thu k’ni cu Latin ng’thu awn a k’phan ah kya ci. A cun a bi nak cu khokum 40 peng peng bi ciah kya ci. A cun ah a k’phlan cu Catholic yumtu ng’bum ung a mi mang lo ah kya ci. A ni no a guk nak ung ng’thu k’ni kä tä kä k’kei ne kya cu Boi Yesu kä tä ah kya ci ci ne guk ciah kya ci. Christu kum 400 ung Roma Mânggo cu Babarians k’chang k’ghat ghum gui no tuk ne lak u hleih yaica buiawt ci gui a k’daa Bethlehem ah hlo ah a kya ah hlak ciah kho ah dong ci gui ah kya ci. Bä ciah Jesrome no a ni ah bi loh gui a van ng’düm ne Yaica buiawt ci gui cu gonhtot gui ciah kya ci. A ni no a pyein cu “Tuhchü mi mi no ng’thu k’ni a cang ah mi läk ciah hngün hngok gui mi k’phlan ciah kya ci” ci ne pyein ci. Bä ciah Jerome cu a kya ah k’tha na ne a bi loh nak gui awn bongbai lo ne Christu kum 420 ung shih ciah kya ci.
