Bawi Yeisu Aghün Lo Ba Lah Khanmopi-ah Akai ba Mong
Bawi Yeisu ashih kon-ah kyün k’hngüp kho ng’ngawi-ah ng’dawt hta neh hngumi ashah cuh Bawi-ah kyä cuh k’chi tui ng’ui-awn hlup vai neh m’cim hngün-ah hteit ci gui. Cunte u kä om ca ng’phuh hngün bäng cuh hnguh ci gui. M’cim hngün khai nak-ah lung nu cuh aphe-ah ng’le neh ng’täng hleih hnguh ci gui. M’cim hngün cuh aghawng-ah om neh Bawi-ah gawk cuh phih kä hnguh ci gui. Khanhtapup noh ngami-am am’thein lo gui cuh Yeisu cuh shih ci gui-ung ak’sho kä om ci nei. Cung phih ghüng lo ba pi ci. Cung phih ani cuh ghüng lo ba pi ci. Yei kyai neh hteit ba neh m’thein tu ba gui vä ci neh m’thein gui ci.
A cun vai lah hnguhmi gui cuh ak’ten-ah dawng ba u neh hlu läk ng’shä gui-am m’thein tu ba gui u hleih Peteru lah yohan cuh m’cim hngün-ah ak’ten-ah dawng neh teng ci goi. Bawi-ah gawk maih hleih hnguh ci goi. A gawk ami pin nak-ah hlui hlak lei cuh om hleih hnguh ci goi. Bawi cuh shih nak m’chüt neh ghüng lo ba ci.
Bawi cuh ma pi k’bäih neh Maria Magdaleana ng’ming nak ca kat nak ak’da-ung kah noh ak’phyon te-ah hngumi-ah ma ng’dang ci. Bawi cuh ani k’tha ng’kya neh ani pigo-ah hteit ba ci goi-ah ahlu läk goi-ah ma-ah phih ng’dang ci. Bawi a ghün lo ba hmat ma ca ahlu läk ng’shä gui cuh kä hmat tu pha ca ahlu läk ng’shä gui-am m’thein tu ba vai u neh hteit ci gui. A hlu läk ng’shä gui kyüm neh im k’kyong-ah ami ng’bum yah-ung aming’lung-ah Bawi cuh ng’dang lo hleih m’cha-ah ng’ngai neh cäi cat ci gui. Cunte Bawi noh “ Nangmi-ung sim kyäp nak om hlä. ”ci neh pyein na gui ci. Ne tah ei phih atä-h ei püi gui ci. Thomas cuh ngami-awn atäng-ah kä om tu yah ci. Bawi cuh ghüng lo ba neh aom lo ba püi cuh m’thein tu u hleih kä yum neh “A kut-ung ami chen nak-ah k’hma leim kä hnguh, ami chen nak-ah k’hma leim-ung ka kut kä tun-ung, ami k’tawk nak-ah ave k’hma leim-ung ka kut kä ghawn-ung kä yum khai ci neh pyein ci.
Kä aho hleih Bawi noh ng’dang lo ba neh “ Thomas-aw na kut k’shäng ge neh na teng-ä, na kut-awn ka ve tawk neh cam lo.”ci hleih, Aw ka Bawi-ah maw, ka Khanpughü-ah maw, ci neh m’shang ba ci. Bawi noh “ Nang cuh kei na hnguh neh na yum ci. Ngawi-ah kä na hnguh neh na yum ci gui cuh bä ci gui nei” ci neh pyein nak ci. A pyein hlü cuh mikmi gui mi yum tu-ah phäh ngawi-ah suh na pe gui khai ci neh apyein-ah kia ci.
Bawi noh mikmi gui-am ani-ah ghün om nak, ashih nak lah aghün lo nak ba gui-awn mikmi gui-ah vuuk kat nak gui, shih nak gui cuh ng’dün hleih ghün nak-ah na pyan pe gui khai-ah mong cuh na m’thei gui ci. Hti theing ca k’hngüp-ung shih neh ak’thum k’hngüp (Easter) k’hngüp-ung ghüng lo ba ci. A caw kia hleih aghü lo nak ba-ah Pasca poi cuh mi bi ba hti ca kia ci. I kia hleih ci-ung Bawi noh shing m’kang-ung ashih hlu-ah mikmi-ah shih nak vai hlü cuh na m’di k’hmaih pe gui ca kia ci. Mikmi gui tumat hti cuh kho k’hngüp ät-ung mi shih khai. Cunte cun-ah mi shih nak cuh Khanmopi-ah hteh nak vai lam-ah kia neh mi Bawi Yeisu-ah hlo-ah ng’dün hleih ghün nak-ung mi om tu khai.
A ghün lo ba kon-ah kho k’hngüp k’phli kyip ahlu läk ng’shä gui-awn atäng-ah om neh “Peteru-am ka tho gui m’bei gui-ä.”ci neh pyein ghüt ci. Khanmopi-ah akai lo ba vai-ung “Kei cuh nangmi-awn atäng-ah kho m’dek ang’pyi güt chüt hleih ka om khai.” ci neh pyein ghüt ci. Mopi lah kho m’dek Shangpughang cuh mikmi ka vai mopi-ah hngün cuh na pyan pe gui khai. A caw kia hleih mikmi gui cuh kho m’dek khan mi ghün yah-ung I mäih vuuk kat nak gui aom-ung phih yei kyai nak, ng’ngaih u nak ak’be-awn mi om hnging ca kia ci.
