Bä ciah Padre Pio ah ghünlu a mòng

Bä ciah Padre Pio cu Christu kum 1887 ung htumkhaw Itaky, Pietrelcina piggo hta ung a mi hta nak ah kya ci. A ni cu a kho kum 16 ung Capuchin Yahteih ng’htoi un glut tu ne St. Pius I a m’tamkhah nak awn Pius ng’ming cu lak ciah kya ci. A kho kum 23 ung Taigü Boi ah kya lo tu ciah kya ci. A k’hmo yah ung a kya ah duyai ne htum kho Italy, San Giovanni Rotundo ung Franciscan Yahteih kyawng tumat ung om tu ciah kya ci. Christu kum 1887-1968 ung nga tu pi ciah k’taigü Boi tumat ah kya ci. A ni cu a täng ah om ci  gui ah k’chang gui awn a k’ni hta ah ng’khot ng’gei ne kä ng’dang ein hleih ng’con ne om cu yum ciah kya ci. Cun tu pang ah phih a ni cu Francis Asisi vai hlü ah a ni ah ve, a kho pyang lah a kut ung Boi Yesu ah k’hma leim gui ng’dang lo hleih a ni ah ng’ngaih ah hlo ah a om k’ih gui cu kä kya ba ciah kya ci. K’chang gui am m’htein tu vai ah khat ciah k’hma leim gui cu Christu kum 1910 Taigü Boi ah a kya lo tuk um ung a ni ah kyä ung gok lo Stigmata gah ciah kya ci. Stigmata ci cu Boi yeisu no a yaica nak ah k’hma leim gui ung gui ah kya ci.  A k’cum ah k’hma hleim gui ung shi cu a k’däih ah  lut lo hleih a yaica nak cu kho kum 50 peng peng a yai nak ah kya ci. A k’hngüptäi hleih k’chang gui a k’daa leng leng lo u ne a ni ah k’hma leim a mong cu ng’shi k’ca lo ci gui ah kya ci. Padre Pio cu Kho m’dek k’khan ah Khanpughi cu ghüng ne om ci ci cu k’chang gui no a k’ni ah a mi hnguh hmat vai ah a ni ah hma leim awn m’dang ciah kya ci.

Bä ciah Padre Pio cu Boi Yesu ah k’hma leim gui a kyä un gung cang hleih gah tu lang pang hlei phih yum tu ng’bum kho mang ci gui lah yum nak lam ung bi lo ci gui no phih k’chang gui ah ng’lak ah a ming thang ne k’chang a k’daa no a hmat ah Yahteih tumat cu kä ng’yak hlü u ne a hlü hlü düt ah pyein u ne yum tu ng’bum ah ng’ming shek khai ah a ci düt ah pyein na a mi puk ah kya ci. A cun ah kya hleih ngami no Padre Pio cu k’chang gui ah hngu ah kä om ein tu ba ne a k’hla ah a hteh vai ah pyein lo ci gui. Ngami no a cun ah ci tu pang lang u hleih phih Padre Pio cu a k’cang ah a k’hma gui a kya ah m’neh ne yaica ciah kya ci. A ni ah kyä ung a gah ah Boi Yesu ah k’hma leim no a kya ah a kyä m’ne hlak tu tä ci a ni am kä cang ci ah a mi pyein nak gui ah phä ah phih a ni ah m’lung cu a kya ah thüi hlei ciah kya ci. Christu  kum 1968 ung a ni no a m’neh ah Boi Yesu ah k’hma leim gui cu kä shih pha hta yah ung gü ba yop ciah kya ci. A ni cu k’kho hngüpät ung nayi m’chin k’10 kat k’pyhin nak bi ciah kya ci. Bä ciah Padre Pio cu Christu kum 2002 ung Papa Shangpughang a k’hngih nak John Paul ah kut ung Bä ciah k’chang tumat ah kya lo ciah kya ci.