Thei-leh ci-ah khawh k’ngäng.
Cun zah ung Jesu nawh a-hlu-läk gùi-àm a piéin cuh, ng’büh ng’mang ci-ah k’chàng tumat-àm, a khawh k’säm nawh a khawh a ploh péit-ah piéin neh ami ng’cháknák, Ani nawh a khawh k’säm cuh, thäm nehtah, “Nang-ah màwng ka ng’zák cuh a i-ah néi? Ngùi na bi zah-ung, na guk te gùi lo püi neh na k’hmuh lo-ä. A i-ah kia hleih ci-ung, nang nawh cein kon-ah, kei-ah khawh kä na säm bà khai,” ci neh a piéin. Cun kon-ah khawh k’säm nawh a m’lung ah ng’ngài neh, “Ka Báwi nawh khawh sämnák-ung-kah, a na nong pi-ah kia ci. A i-ah ka kia vai mä. M’Dek ka coh vai cuh, kä ka m’chüt khai. Ng’Zòi neh ka ei vai-ah ka hmai thui-èi khai. Khawh sämnák-ung-kah, ka hläih kon-ah, k’chàng gùi nawh ami im-ung ami na m’om tu vai-ah, a i ka ci vai kä ka hmat ci,” ci neh ng’ngaih tüh nehtah A Báwi-àm, a phù a thúng vai om ci-ah k’chàng päng cuh tumat phäh phäh-ah thäm gùi neh a thäm htük àm, “Ka Báwi-àm, i-chü na thúng bà vai om ci ang?” ci neh ng’si hleih, “ k’Chi-petui nän-ah phia,” ci neh a m’sàng bà. Khawh k’säm nawh phih, k’hmoh nehtah, “Na punák, guknák-ung nän-ah k’hmakip-ah na guk vai,” ci neh a piéin. A hei k’chàng tumat-àm phih, “Nang mä, i-chü na thúng bà vai om ci ang?” ci neh ng’si hleih, “Kiung k’htang nän-ah phia,” ci neh a m’sàng bà. Khawh k’säm nawh na pu na guknák-ung, k’chéitkip-ah na guk vai,” ci neh a piéin. A cun kon-ah kä chin hleih bi ci-ah, sin-ah khawh k’säm cuh a ngói-ah kavai, hngu thei neh a ci te-a phäh-ah, a Báwi nawh ngak ci. A cun-ah kia hleih khaw m’dek k’chàng gùi nawh a cu gùi-ah hngù-ah, Khãnpùghí-ah k’chàng gùi-a tah, hnguh hmat tu bà thei ci gùi.
Kei nawh phih, nangmi àm ka piéin cuh, sin-ah katnák-ah kia man ci-ah ngùi khawh-tang-awn nangmi nawh teih püi k’ní gùi nami sui vai. A cu kon-ah, ngùi amaih lo k’hngüp-ung nangmí phih a k’cùm-ah nami ghing om tu khai. A pihtá-ung ni ci cuh däm ci-ung phih ni k’ci. Api htá-ung kä chin hleih ci ci cuh a màwng k’däm-ung phih kä chin hleih ci ci. Cun-ah dí-chük ci-ah khawh-tang ung nami piéin-ah kä nami om-ung khawh-tang k’ni k’càng-ung, a u nawh ning zùm gùi khai ang? Kä na mät ka-ung, ning zùm vai-ah kä na kia-ung, na mät ka cuh u nawh ning pe khai ang? A u nawh phih, Báwi k’hngih kavai-ah kä bi hnging khai. A i-ah kia hleih ci-ung, tumat ú neh tumat cuh m’hni khai. Tumat äp neh tumat cuh i-ah kä hlui neh kia khai. Nangmí nawh Khãnpùghí lah khawh-tang kavai-ah kä nami bi hnging khai.
