Hmat Vai Gui
Shih nak lam-ng ngui ghui gui phah-ung Monuawi noh na gaih tu khai. Kho m’dek k’khan-ah ngui, ghui gui i mäih a da-ung phih aa na i mäaih a om-ung phih Monuawi phäh gaih vai düt-ah kia ci.
Ngui, ghui i-ah mäih ada-ung phih shih nak cuh k’hleih neh kä gah. Aa na, khoh cham I maih aom-ung phih shih nak cuh kä m’ghu hnging khai.Caw kia hleih ghün yah-ung ak’dim ak’kyäp-ah shih hnging vai k’tha nak vai cuh hlü ci. Shih nak cuh k’chin vai hlü-ah lo khai ci neh ng’thu theing-ung aom-ah hlo-ah shih nak vai kho k’hngüp,k’hngim’chin cuh kä hmat hnging-ah kia ci. Shih nak noh cuh ghü ng’vai kä ghü ci. Mi hnguh -ah ci-ah ak’hmo phih shik ci. Ng’kyäng lo tha ci phih shiih ci. K’chu cei mah lo ng’lung ca ng’lami ng’pyangmi phih shih ci. A m’shah cuh abi loh ng’hloi ng’hlak lo k’hläm hleih shik ci phih mo hnguh hnging ca kia ci. K’chang cuh I-ah-ung phih shih hnging cuh van nih hmat-ah kia neh u noh kä k’shing ci vai hlü-ah mi om lo ci. Kchang cuh ng’ngaih äp nak-awn ghün-ah akia-ah hlo-ah shih kon-ah hoi hteh vai cuh ng’ngaih nal vai hlü ci.Cang ci cuh mät-ung hnguh ci hlo-ah mät noh mät noh hmat vai cuh hlü lo ci. Kä k’hmat m’cai kä goi ge tumat ci u kä om khai. Goi ge lo-ung gai yah-ung ka hlo-ah m’chüt man te gui hngo kä m’chüt nün ba. Cun gui cuh Khanpughü noh I mi m’chüt ci-ang ci cuh ana hmat ba hlak gui-ah kia ci. Go lo-ah akia-ung m’lung phih kä ii-ah se lo ci.
Cun gui cuh ng’mü m’cha lam täng hnguh hmat ca ng’vai gui noh ami pyein om ci. Cun-ah m’chin cuh mät noh mät m’shi m’theing ba vai-ah a ching-ah kia ci. Cun-ah m’theing ba-ah aching ci cuh ng’hngai kai ci-ah m’shi mei-ung m’hling ba neh ng’hngai ng’päit khai-ah te ba-ah hlo-ah ni, le neh boh kia ca hlui hlak gui m’vawm-awn hluut neh htung -awn te neh, k’päp neh m’hlo ba-ah hlo-ah kia ci. Cun-ah hlo-ah k’hmo yah-ung leng neh kat gui da ca mikmi-ah ng’mü m’cha lah pum kyä cuh m’ghüih neh te neh m’theing m’htaih ba vai hlü lo ca kia ci.
Cun-ah hlo-ah k’hmo-ah-ung leng neh bi lo-ah kat nak gui cuh kum sho lo neh le vai hlü-ah ng’hngei neh shah lo ci. Caw kia hleih ang’ghüt-ah m’thei m’htaih vai hlü lo ci. Cun gui kä theing htaih pha hleih sih-ah kia-ung di dam nak-ah gok vai cuh ng’khän lo ci.Khanpughü noh ng’pyan ng’tham nak ba vai-ah apong püi-ah kia ci. Cun-ah m’theing m’htaih nak ba cuh Purification Stage ci-ah chü-ah kia ci. Cun cuh k’pami-ah kia-ung kho kum 30 -ung ka noh 50 lah k’hngumi-ah akia-ung 25 ung ka noh 50 hlok-ah k’bäi neh cun-ah Purification Stage cuh bui khai-ah kia ci. K’hmo yah neh gai yah-ung m’lung m’däm nak gui cuh nong neh Khanpughü täng-ah ng’hlah ba vai-ah phäh-ah Khanpughü noh abi-ah kia ci. Kä ng’ngah tüh te-ah vuuk nak gui bui lo nak, sih kyuk go pyam nak gui bui lo cuh kei ci neh ng’lä ng’tai nak gui cuh cha lo vai phäh kia ci.
Cun gui m’chüt nak vai cuh mät noh mät hmat neh do thei vai cuh ak’tung pi-ah hlü lo ca kia ci. Mät noh mät hmat nak-ung
Mät noh mät cuh mät-ah ng’ngaih-ah hmat nak
K’chang hngei noh ana hmat hlok-ah mät noh mät hmat nak
K’chang hngei noh ana ng’ngaih hlok-ah mät noh mät ng’ngaih nak
Mät noh mät kyüm be hleih hnguh hmat nak gui-ah kia ci.
Cun gui ang’päng lo-ung do thei nak vai hlü lo ci. Mät noh mät cuh ng’vai lo ci-ah ng’vai lo-ah mong cuh do thei vai hlü ci. Kä hnguh kä hmat-ah kia-ug kä hnguh kä hmat-ah täng-ah do thei vai. K’chang päng noh kei hoi kah ka lo ci, hoi ka gok lo yah ci, hoi ka hteit khai ci neh ng’ngah tüh vai hlü ca mong cuh ka ning k’hmuh tu gui hlü nei.
