Khanpughü Shui Nak
Khanpughü noh ak’cang-ah aom nak-ah mong gui cuh na m’dang gui hleih mikmi gui-awn atäng-ah aom cuh mi yum ci. Kho m’dek khan shing ghüng kho gham gui cuh mi dan-ung Khanpughü-ah bi gui cuh mi hnguh hnging khai kia ci. Mi pei gui mi teng-ung tüi pyang ci cuh mi hnguh hnging ca kia ci.
Kho gui kho m’htung gui noh pyang tham ca Khanpughü-ah ni bä nak cuh m’dang ci gui. Pinle tui nu lah kyom htang ca tui hloi gui noh ani-ah bi thei, bi hnging nak cuh m’dang ci gui. Kho k’hngi, shing lim khu pai gui noh ani-ah kyom htang nak cuh m’dang ci gui. Ai hli, k’hngi k’cha gui-ah hngün thoh nak gui noh ani-ah hnguh hmat nak gui cuh m’dang ci gui. Ni bä neh m’tngi nak-awn be ca k’chang ng’bum gui noh ani-ah m’hngi nak cuh m’dang ci.
Bawi Yeisu kyum lo pha-ung Khanpughü noh a ng’shä k’chang gui cuh tüi gui neh ani ami hmat vai-ah bi ci. Cun-ah hti theing ca k’chang gui cuh Prophet gui neh chü gui-ah kia ci. Prophet gui cuh k’phyon ca Bawi alo nak vai-ah k’chang gui ng’pyang tham hlak gui cia k’chang k’ni gui-ah kia ci. Vai hlü-ung kah Moese cuh hlüng tai ca k’chang k’ni gui-awn Khanpughü noh k’chang gui ami ni vai, kat nak nong hnging neh ani ami yum lo pi hti vai-ah m’thei gui ci.
Cun lon püi-ah ahta k’phyon ca Bawi cuuh tüi lo ci. Ani cuh shing k’thum-ung kah ak’hngih nak-ah kia ci. Ani-ah kho m’dek khan a ghün om nak cuh Khanpughü-ah akia tu k’cang-ah mong cuh m’dang cheng geng ca kia ci. Ani-ah hngip hngäi hting ling nak gui, hlawk k’se nak kä om nak gui, k’chü m’gein nak lah m’hngi yei nak gui cuh mi ng’thei tu hnging ca kia ci. Mi kat nak gui phäh mi ng’yu ba yah-ung ani cuh m’gein ca pa Khanpughü-ah akia-ah mong cuh mi hmat khai kia ci. A no cuh na gung gui vai, mi leim na m’tui m’hleih pe gui vai neh age-ah ak’cum-ah om kia ci. Cun gui cuh puma vai hlü-ah na m’thei gui ca kia ci. Cun-ah m’thei nak gui lah abi loh gui cuh ng’thu theing-ung mi hnguh hnging ca kia ci.
Ca cüm ci cuh Khanpughü noh mikmi-am ana peit gui-ah hti theing ci-ah ca uk-ah kia ci. Ng’thu theing cuh mi teng-ung ng’thu k’phyüm lah ng’thu k’thai ci neh mi hnguh hnging ca kia ci. Ng’thu k’phyüm-ung tüi pyan nak gui, Nu pa k’htük-ah kat nak-ah mong gui lah k’phyon ca Bawi akyum vai ni kho kum k’sho ami gün te-ah mong gui cuh mi hnguh hnging khai-ah kia ci. Ng’thu k’thai lei-ung k’phyon ca Bawi-ah mong lah yumtu ng’bum i hlok cha ang’tün pong lo cuh mi hnguh hnging khai-ah kia ci. Yum tu ng’bum cuh khanmopi-ah kai nak vai-ah lam-ah akya-ah mong cuh ng’thu theing-ung mi hnguh hnging ca kia ci.
Khanpughü noh ani-ah m’thei m’thang gui cuh gu then khai-ah hti theing ca k’chang gui ghü gui neh phan gui ci. Cun-ah mong gui cuh ng’thu hteing -ung guk then-ah kia ci. A caw kia hleih cun-ah ca cüm cuh Khanpughü-ah ng’thu hteing ci neh chü-ah kia ci. Ng’thu theing-ung kä mi guk then tu-ah mong gui cuh ng’thu m’gawn-awn ami na ng’thei vü gui cun phih om ca kia ci. Cun-ah ami na am’thei vü gui cuh thung man tham man gui ci-ah kia ci. Ng’thu theing lah thum gui cun noh Khanpughü-ah m’lung yei khai-ah ci pe hnging khai-ah yei neh m’lung üp khai-ah ghün om nak vai gui cuh na m’theing m’thang gui ca kia ci.
Mikmi-ah Saya Bawi yeisu cuh mikmi na m’htei gui neh apa Khanpughü-ah na khah püi gui kia hleih amät noh amät ni ca hto k’shäm ci neh chü ci. Ani cuh kho m’dek khan-ah ka noh hteit ba hleih ani-ah hngün thong khai-ah PaPa Shangpughang cuh ghü neh k’hmoh ghüt ci. PaPa Shangpughang cuh yumtu ng’bum cuh Khanpughü kavai m’thei m’thang neh khong mang ca kia ci. K’chang k’ni chang k’bä gui mi kya tu vai-ah k’tha na pe gui ci. Kho m’dek khan om ca Sayataw gui-ah lu k’kye-ah kia ci. Ani cuh mikmi gui-ah yum nak a däm da lo pi hti vai k’däih neh na m’thei m’thang ba gui khai-ah Sayataw gui cuh gung tu gui ci.
