Theing Thap nak lah Cang Nak
Na kyä i hlok-ah ahlü-ah mong na ng’ngaih tüh shüm man no?
Tawk neh gah, teng-ung hnguh nak gui, thui tui hmat nak gui cuh kho m’dek k’om gui hmat thei neh m’hngi nak thei vai phäh kia ci.
Khanpughü noh na k’aw, na mik, na kut kho gui cuh ni nak-awn be khai-ah aning pyan peit-ah kia ci. M’shi nak Secramentu na gah tu yah-ung Hti theing ca Muh Khangpughü noh kyum lo neh na pum kyä pum cuh am’hti theing püi-ah kia ci. A k’hma nak lah ak’chuk nak am’cäi nak-ung mät-ah kyä lah k’chang hngei gui-ah kyä gui cun phih m’hngi yei nak vai ci neh m’cäi ci. Mät-ah kyä cuh am’hti theing püi-ah kia neh a yei tu vai-ah phih m’htei vai hlü ci. Mi ng’ngah tüh, mi k’chü kyo, mi bi loh gui cuh ahti theing-ung mi kyä cun phih hti theing khai kia ci. A ni-ah ng’yak hlü cuh adüm ak’kyäp-ah mi om neh kä ni ca ca uk gui, müi gup gui, video gui cun phih hloi vai ng’ya hlü ci.
Khanpughü noh k’chang hngei gui-awn ng’hta ng’ko om k’ih nak gui-ung phih k’chü khän te gui-awn ng’cawih hleih om vai ng’yak hlü ci.
Ng’khah nak Secramentu gah yah-ung m’cu te-ah k’chü khän gui cuh m’thing neh läk-ung Khanpughü noh kyüm be ca ceisu gui cuh na pe gui khai kia ci.
A k’chüih nak lah a gha nak am’cäi nak-ung khoh cham gui lah taga nak cuh m’cäi ci. Khanpughü noh mät-ung om ca khoh cham hta-awn m’lung m’üp neh k’chang hngei gui-ung om ca khoh cham gui ng’yak tu hlü hma nak gui nong hnging vai cuh ng’yak hlü ci. Ng’yak hlü k’hma ci cuh kä mät-ah khoh cuh kä ni ca lam-awn ng’yak tu hlü-ah kia ci. K’chang hngei gui-ah khoh cham gui cun phih m’hngi neh m’htei peit thei vai hlü ci. Cun gui kä läk-ung cuh m’cäi nak cuh k’hleh-ah kia ci. Mikmi gui noh mi mät-ung om ca khoh cham gui m’htei neh k’chang hngei gui-am phih pe ta neh mi kia nak-awn cun-ah m’cäi nak cuh mi m’htei hnging khai-ah kia ci. K’chang hngei kah ng’va ng’kai tu-ah khoh gui cuh peit tu ba vai, di neh boh maih ne boh akia-ung m’thung tu vai hlü ci. Cun cuh k’chang hngei-ah khoh m’htei tu peit-ah kia ci.
A cheit nak am’cäi nak-ung im pei-ah kah nong neh hle pyein nah kä ng’hun tu vai ci neh m’cäi ci. Cang ci cuh pyein vai. Khangpughü cuh cang ci yum ci. Cang ci pyein ci cun phih yum ci. Mi Bawi Yeisu mät phih kho m’dek khan aom yah-ung cang ci bäng pyein te ca kia ci. A caw vah na ng’yah gui hlü ci.
A hngät-ah kia-ung cang ci pyein vai mi m’kha ng’gün hti ca kia ci. K’chang hngei-am non vai phih mi ng’ngah tüh nak gui om ca kia ci. Cun gui nong neh thing ling chüi kha neh cang ci bäng pyein neh mi om hnging-ah akia-ung Bawi Chritu-awn mi täng lo tu hnging khai-ah kia ci.
