K’Hngumí kat-mah tumat.
Ei a ei tu vai-ah pharisee tumat nawh a béit tu. Cun-ah Pharisee-ah im-ah lut neh vài tu ci. Pharisee-ah im-ah, ei a vài tu zah ung pigò khàw-ah ng’ming k’sé tháng ci-ah, k’hngumí tumat lo ci. Pharisee-ah im-ah ei a ei tu ng’za te ci-ah kia neh a phù däm ci-ah sing ng’ùi-tui, lung-báwk ùm tumat ung lo püi ci. Hngu täng-ah lo neh a khaw kung-ah ng’düí neh kiap ci. A khaw-ung htè ci-ah, ng’phlì-tui cuh alumu-awn ghuit ci. A khaw cun phih k’hngam neh sing ng’ùi-tui-awn hlup ci.
Báwi be tu ci-ah Pharisee nawh hnguh neh “Sin-ah k’chàng ce ng’sä-ah a kia-ung, ani tòn ci-ah k’hngumi a u, a i-a hlo-ah k’hngumí-ah a kia hmat khai hlü. Kä k’bü-ah om ci-ah k’hngumí-ah kia ci,” ci neh ng’ngaih-tüh ci. Cun, Jesu nawh a béit lo cuh, “Nang Simon, nang-àm tumat ka piéin vai om ci.” Ani nawh phih, “Báwi aw piéin-ä,” ci ci. “Ngùi k’pu ci-a kah, pu tu ci k’hngih om ci. Tumat nawh ngùi tàng-kà phia k’hmà, tumat nawh k’hmàkip pu tu ci. Ani thúngnák bà vai kä om hleih kä thúng bà hlak goi ci. Cun-ah kia hleih a u nawh ani m’hni tu bà khai-ang?” “A pu dá tu bà ci-ah ka ng’ngài ci,” ci neh Simon nawh piéin ci. Jesu nawh phih, “Na càng ci,” ci neh piéin nehtah, Cun-ah k’hngumí täng-ah màng nehtah Simon-àm, “Nang nawh sin-ah k’hngumí na hnguh ci-ang? Na im-ah ka luh lo zah ung ka khaw ka m’sinák vai-ah tui kä na nà pe ci. Sin nawh ka khaw, ng’phli tui-awn m’coi neh alumu-awn ghuit ci.
Nang nawh kei, kä na nà ng’ùi ci. Sin-ah k’hngumí nawh ka luh lo-ung tün neh ka khaw ng’ùi laih-laih ci. Nang nawh ka lù sing ng’ùi-tui-awn kä na hlup ci. Ani läí nawh ka khaw, sing ng’ùi-tui-awn hlup ci.Cun-ah kia hleih nang-àm ka piéin cuh, “Sin-ah k’hngumí nawh akia-ah m’hni ci-ah kia hleih kat a k’dá-ung-kah phiòng ci. A pihtá-ah k’phión cuh a pihtá-ah m’hni ci,” ci neh piéin ci. Cun kon-ah cun-ah k’chàng- àm, “Na kat-ung-kah, na phiòng pi ci,” ci neh piéin ci. Báwi-awn èi vài ghom ci gùi nawh “Kat hngo k’phión ci-ah sin-ah k’chàng cuh, a u ang?” ci neh lèng neh ami m’lung-àm piéin ci gùi. Báwi nawh cun-ah k’hngumí- àm, “Na zùmnák nawh ning k’phión ci. A k’dìm kiäp-ah hteit-ä,” ci ci.
Ng’yu ba neh Bawi ah hteit ba ung Bawi noh a k’cum a na k’phion ci cuh mi hmat ci. Kat mah k’hngumi tumat cuh Bawi noh k’phion ci. Mikmi phih Bawi ah k’phion nak mi gah vai mi ng’yu ba vai cuh hlü ca kya ci.
