Gupertino Mânggo ung ka Bä ciah Joseph ah ghünlu a mòng
Bä ciah Joseph cu Italy ghunkhaw, Gupertino Mânggo ung om ciah a k’hngim gah ciah k’cham a k’däm nu tumat ung ng’tüi ciah kya ci. A ni cu a lu k’chok kä gaat tu tu ciah a k’hmo tumat ah kya ci. A hei a k’hmo hta gui a ni awn a täng ah a mi lum tu cun phih kä yum ciah kya ci. ng’kyäng lo ne Capuchin Yahteih kyawng ung ei ok k’shong ah bi bi tu hleih phih kä ng’hloi ciah kya ci. A k’hngu ah a ni cu ng’müi m’cha lam ah m’nai tu vai ah k’chang tumat ah a kya lo cu a k’ni ah van no hmat lo ciah kya ci. Joseph cu k’chang guia wn kä tang ein hleih duyai ciah kyat u lang pang hleih phih a k’hngu ah cameipoi cu aung tang khai ah ci tu ciah kya ci. Christu kum 1628 ung Taigü Boi ah kya lo tu ne goipyam ci gui m’htei nak ah bi leng ne bi ne cäicat vai ah m’yung aa gui a dang hnging cu k’chang a k’daa no yum ngak ciah kya ci. A ni cu lu k’ke k’khan ah ng’voi ne phaya kyawng m’kot ung ka no kho im kyak ung gok khai ah hteit ci ci cu ng’bum imu ng k’taigü ci gui ung ka tumat no a hnguh ah kya ci. Yum ngak vai ah k’chang tumat no phih Joseph cu htanloin ghüng tumat ah a ng’ban ung Zan gah ne m’khukkhu dong hleih hngu man ci ah pyein ci.
Joseph ah ghünlu ng’däih ung a cun ah Zan gah ne a yon nak hti cu 70 vei lo ci ci ne a mi pyein ah kya ci. Phan k’chang gui 10 no 36 pei hlüng ciah shing m’kang k’tung a mi m’düih vai kä m’chüt u hleih Josep no a cun ah shing m’kang k’tung cu kho k’chi k’khan ah yong khai ah ci ne a shäng hta a m’düih peit gui ah kya ci. A cun ah cäicat vai a bi loh gui bi hnging tu lang pang ne phih Josep cu hngip hngäi nak a m’lung m’yo m’nem ne ta mä k’chang gui awn yeikyai ne ng’hta ng’ko ne om ciah kya ci. A ni cu kpyhuuk k’kha gui ah om nak ah a hteh ung a cun ah k’pyhuuk kha gui cu kä yong ein ne düm hta ah om ci gui ah kya ci. A ni ah biloh gui cu yumtu ng’bum ung om ci ah khong mang k’chang gui ah phäh ah ng’ä ng’cäi nak ah kya lo hleih a hla nu ah a mi tüih ah kya ci. A cun ung a ni ah ghünlu a k’hngu lam gui khokum 35 kum cu a mang ah kya ci. Christu kum 1663 ung a ni cu m’hteng ciah läklam gui awn a om nak ah a khan hta ung k’shoh khai ne om ne ta a cun ung shih ciah kya ci.
