Phùghâ Phaya
KkhânpùghíPâhtâ yùmnak gui ung hlûibah ah ngmìng gui cuh täng ci vai hlü ah kya ci tê phih kä täng bà ci gui phih om ci.Kä täng ciah ngngaih gui cuh mhteih neh teng lo ung täng ba ci gui ah phih kya ba ci.Myanmar Ghunkhò púm ung van noh ami pyéin ah Phaya ci cuh Kchò gui noh akdá pí ah kä pyéin tu shàn ci gui.Cung phih phàyà kyòng,bóiphàyà ciah hlûi bah nak gui akdá noh a pyéin mi hngu hnging ci.Cung phih cun ah ngmìng gui cuh Mvá ung ka no lo ci ciah yùm u netah kchò ngmìng on hlûi ba ci gui.Phàyà kyòng am ngbûm im bóiphàyà am ktàigü ciah hlûibah nak ba cuh aktúng pí ah ca gukthén nak gui ung mi hngu hnging ci.Cung phih nghtàngkò pyéinhlak nak gui ung kä nghlôi veih ci gui cuh om ci. Aktúng pí ah Mvá gui on ng’et neh om neh Mvá kchî pyéin mih ca Mvá kló pakkhúi gui ung Mvá gui ah thùng yò om ih cuh ngcôngphyót shàn ci.
Cun ung Mvá on ngshòng ca ahêi pakkhúi gui ah phih kya neh christian ngpài gui ah kya lo ba hleih gukthén nghtàngkò nak gui ung kä täng ba ci.Avaihlü ah phàyàkyòng am ngbûm im ciah van noh pyéin ci gui. Mvá kló akdá pí gui ah kya ca Ngmèn kchàng gui ah om nak ah lòngthà ah kya ca Kchâthà ung Phùghâ ciah pìgò cuh mi hnguh hnging ci.Cun ah Phùghâ ciah ngmìng cuh phàyà ciah tuhchü mi pyéin ah cá a ngmìng ah kya ci. Cá Mvá gui noh ဘုရား am ဗုရား ah ami chü màn ah k’ó on ng’et ci. Kchò gui cuh avan noh Kchòthùng ah mghûngthâ neh om u neh khò päng kyih à u netah aktúng pí ah Pùshihpí lah Kkhânpùghí vah yùm ci gui.Kchò ngvái amshah noh ghunkhò mòòng bi lo u netah Mvá on ät lo píhtí vai,Mvá gui noh ami yùm ah Budha Pahta phih yùm tu neh Mvá ca phih ngthêi tu vai ciah Mvákhò ah kah Budha Phàyà phih yu la tu ci gui.
Cun ah ami yu lák tu ah Budha Phàyà ami mdüm lo nak pah ah Ngdühngün am phùghâ ciah ami hlûi ah kya ci. A cun ung kchàng gui om lo u neh im cô lo u neh pìgò khlüm lo u hleih acun ah pìgò cuh Phùghá Pìgò ah ami chü lo ah kya ci.Acun ah ami yu lák tu kon ah Mvá phùngkí gui om lo neh Mvá ca mthêi lo neh cêitî(ဘုရားစတေီ)gui cô lo neh om hleih amshah cu Budha ah nghûi lo tu ci gui.Cun tu láng pang ah phih ami pùghí pá noh ami yùm màn ah khò am tuk ah mghûngthâ cuh kä chah hlot ci gui. Budha noh a mthêi ah kä ngón phâ vai,kä mghûngthâ vai,mät noh mät äp neh kthá nak vai,u noh lo neh kä na kphyón khai,mät noh mät vah kphyón vai ciah a mthêi cuh na tüî khmüt ca Pùshihpí Kkhânpùghí kä om ci a pyéin hlü cuh u noh kä kshíng veih ci.Cung phih Budha Pahta a gok lo kon ah Christian Pahta gok lo neh Kchò Kchàng gui ah yùm nak lah Catholic Pâhtâ ah yùmnak mtû mcoih neh mthêimthàng lo ci. Kchò pakkhúi gui ung phihMkàng Klò kä cung Nìtú,Kkhân Kchák Pakkhúi gui ah ngtüî om lo nak ah pùmá ung Kkhânpùghí on ngkhîng ngkhông cuh hmat hnging ah kya ci.
